ભાવનગર જિલ્લાના સોનગઢ ગામમાં રહેતા શખ્સે હરિયાણાથી મંગાવેલ ઈંગ્લીશ દારૂનો જથ્થો ધોલેરા પોલીસે ઝડપી લઈ એક સગીર સહિત પાંચ શખ્સની રૂ.૬.૩૯ લાખના મુદ્દામાલ સાથે ધરપકડ કરી હતી.
ધોલેરા પોલીસ સ્ટાફ પેટ્રોલીંગમાં હતો તે વેળાએ બાતમી રાહે હકીકત મળી હતી કે, બગોદરા તરફથી એક ડસ્ટર કારમાં ઈંગ્લીશ દારૂનો જથ્થો આવી રહ્યો છે,અને કારની આગળ એક કાર પાયલોટીંગ કરી ભાવનગર તરફ જઈ રહી છે. આ હકીકત આધારે વોચ ગોઠવતા નંબર પ્લેટ ધરાવતી બલેનો પસાર થતા તેને અટકાવી દીધેલ જ્યારે દારૂ ભરેલ ડસ્ટરના ચાલકને આગળ પોલીસ હોવાની બાતમી મળતા પરત ધોલેરા તરફ હંકારી મુકતા પોલીસે નાકાબંધી કરી એંકર હોટલ નજીક આંતરતા કાર ખાળીયામાં ઉતરી ગઈ હતી. દરમિયાન કારમાં રહેલ બે શખ્સ નાસવા જતા તેનો પીછો કરી ઝડપી લીધા હતા. પોલીસે કારનો કબજાે સંભાળી તલાશી લેતા ડસ્ટર કારમાંથી ઈંગ્લીશ દારૂની ૪૧૮ બોટલ મળી આવતા કબજે લીધી હતી. પોલીસે હરિયાણા રાજ્યના અખિલ રવિંદર દહીયા, ક્રુણાલ જશબીરસિંહ, મનીષ સુરેશભાઈ પારાસર, મંજીતસિંઘ બલવાનસિંઘ રાણા, સંજય ક્રિષ્ન દહીયા અને એક ૧૭ વર્ષીય બાળ કિશોરની અટકાયત કરી ધોલેરા પોલીસે વિદેશી દારૂ, બે કાર, છ મોબાઈલ મળી કુલ રૂપિયા ૬,૩૯ લાખનો મુદ્દામાલ બરામત કર્યો હતો.
પોલીસ પુછપરછમાં હરીયાણા રાજ્યના સોનીપતના સુરેન્દ્ર દહીયાએ સોનીપત સેકટર ૧૫ એલ-૧ અગરસેન ચોકથી ભરી આપેલ અને ભાવનગર જિલ્લાના સોનગઢ ગામના મહેશ ધરમશીભાઈ પરમારને આપવા જઈ રહ્યા હોવાની કબુલાત આપતા ધોલેરા પોલીસે સાત શખ્સ સામે પ્રોહિબીશન એક્ટની જુદી જુદી કલમ તળે ગુનો દાખલ કરી ધોરણસર કાર્યવાહી હાથ ધરી હતી.
