ભાવનગર જિલ્લાના વરતેજ પોલીસ સ્ટેશન વિસ્તારમાં આવેલા ફરિયાદકા ગામે વધુ વળતરની લાલચ આપી રોકાણકારો સાથે છેતરપિંડી આચરવાના ગુનામાં ભાવનગર લોકલ ક્રાઇમ બ્રાન્ચને મોટી સફળતા મળી છે. ૨૦ ટકા વળતરની લોભામણી સ્કીમ ચલાવી કરોડો રૂપિયાનું કૌભાંડ આચરનારા પકડાયેલા આરોપીઓ પાસેથી પોલીસે રોકડા રૂપિયા ૨૦,૦૦,૦૦૦/- સહિત કુલ રૂપિયા ૩૫,૯૪,૫૦૦/-ની મતા રિકવર કરી છે.
પોલીસના જણાવ્યા અનુસાર, વરતેજ પોલીસ સ્ટેશનમાં ભારતીય ન્યાય સંહિતા-૨૦૨૩ની વિવિધ કલમો તેમજ જી.પી.આઈ.ડી. એકટ (GPID Act) હેઠળ ગુનો નોંધવામાં આવ્યો હતો. આ કેસની તપાસ દરમિયાન પકડાયેલા આરોપીઓ સંજયભાઇ મુળજીભાઇ ધામેચા (ઉં.વ. ૪૪, ધંધો: ડ્રાઇવિંગ) અને યોગેશભાઇ વેલજીભાઇ ધામેચા (ઉં.વ. ૩૦), બંને રહેવાસી ફરિયાદકા, તા.જી. ભાવનગરને કોર્ટમાં રજૂ કરી ૧૪ દિવસના પોલીસ કસ્ટડીના રિમાન્ડ મેળવવામાં આવ્યા હતા. નામદાર કોર્ટે આરોપીઓના તા. ૧૩/૦૭/૨૦૨૬ સુધીના રિમાન્ડ મંજુર કર્યા હતા.
રિમાન્ડના સમયગાળા દરમિયાન પોલીસે કરેલી સઘન પૂછપરછમાં આરોપીઓએ કબૂલાત કરી હતી કે તેમણે રોકાણકારો પાસેથી મેળવેલા નાણાંમાંથી અમુક કિંમતી ચીજવસ્તુઓની ખરીદી કરી હતી અને મોટી રકમ પોતાની પાસે રોકડી રાખી હતી. આરોપીઓની આ કબૂલાતના આધારે લોકલ ક્રાઈમ બ્રાન્ચે સપાટો બોલાવીને કુલ રૂ. ૨૦,૦૦,૦૦૦/- રોકડા, રૂ. ૮,૨૩,૫૦૦/- ની કિંમતના સોનાના દાગીના, રૂ. ૭,૦૦,૦૦૦/- ની કિંમતની સુઝુકી ડીઝાયર કાર GJ-4-FA-4469, રૂ. ૭૦,૦૦૦/- નું એક્સેસ સ્કૂટર GJ-04-FC-8148, રૂ. ૧,૦૦૦/- ની કિંમતનું તૂટેલી હાલતનું નોટ ગણવાનું મશીન તેમજ હિસાબ લખેલા ૨ નંગ ચોપડા જપ્ત કર્યા છે.
આ કૌભાંડની વ્યાપકતા ખૂબ મોટી હોવાનું સામે આવ્યું છે. આજદિન સુધીની પોલીસ તપાસ દરમિયાન ફરિયાદી સહિત કુલ ૧૦૩ સાહેદો (સાક્ષીઓ) ના નિવેદનો લેવામાં આવ્યા છે. જેમાં પ્રાથમિક વિગતો મુજબ રોકાણકારોના કુલ રૂપિયા ૬,૧૯,૨૪,૫૮૮/- પરત આપવાના બાકી હોવાનું જણાઈ આવ્યું છે.
આ છેતરપિંડીના કેસ સંદર્ભે ભાવનગર જિલ્લા પોલીસ દ્વારા જાહેર જનતાને અપીલ કરવામાં આવી છે કે, જો કોઈ પણ નાગરિકે ફરિયાદકા ગામના સંજયભાઇ ધામેચા અને યોગેશભાઇ ધામેચા પાસે નાણાંનું રોકાણ કર્યું હોય અને તેમની રોકાણ કરેલી રકમ કે પાકતી મુદતની રકમ પરત મળી ન હોય, તો તેઓ કાયદેસરની કાર્યવાહી કરાવી શકે છે. આવા ભોગ બનનાર તમામ રોકાણકારોએ પોતાના જરૂરી આધાર-પુરાવા અને દસ્તાવેજી સાહિત્ય સાથે ભાવનગર લોકલ ક્રાઇમ બ્રાન્ચ ની કચેરીનો તાત્કાલિક સંપર્ક કરવો.
