નવા સરોડ અને ખીજડીયામાં બાલિકા પંચાયત દ્વારા પ્રેરણાદાયી વૃક્ષારોપણ

મહિલા અને બાળ વિકાસ વિભાગની આગવી પહેલ હેઠળ ભાવનગર જિલ્લાના પાલીતાણા તાલુકાના નવા સરોડ અને ખીજડીયા (મોખડકા) ગામે બાલિકા પંચાયતની કિશોરીઓ દ્વારા વૃક્ષારોપણ કાર્યક્રમનું સફળ આયોજન કરવામાં આવ્યું હતું.
ભાવનગર જિલ્લા મહિલા અને બાળ અધિકારીની કચેરી હેઠળ કાર્યરત ‘સંકલ્પ હબ ફોર એમ્પાવરમેન્ટ ઓફ વુમેન’ યોજનાના માર્ગદર્શન હેઠળ આ વિશેષ કાર્યક્રમ યોજાયો હતો. જેનો મુખ્ય ઉદ્દેશ્ય પર્યાવરણ સંરક્ષણનો સંદેશ આપવાની સાથે કિશોરીઓમાં નેતૃત્વ ક્ષમતા વિકસાવવાનો હતો.
સ્થાનિક આંગણવાડી કેન્દ્ર અને ગામના આગેવાનોના સહયોગથી યોજાયેલા આ કાર્યક્રમમાં બાલિકા પંચાયતની દીકરીઓએ ઉત્સાહભેર વૃક્ષો વાવ્યા હતા અને ગ્રામજનોને પણ વૃક્ષોના જતન માટે પ્રેરિત કર્યા હતા. કિશોરીઓએ કાર્યક્રમના આયોજનથી લઈને અમલીકરણ સુધીની તમામ જવાબદારી જાતે સંભાળી હતી. આ પ્રસંગે આંગણવાડી કાર્યકર, હેલ્પર બહેનો અને સંકલ્પ ટીમ ખાસ ઉપસ્થિત રહી હતી.