રાજ્યમાં વધુ એક વખત દારૂની મહેફિલ માણતા નબીરાઓ ઝડપાયા છે. આણંદના આંકલાવ તાલુકાના માનપુરા ગામે પોલીસે દારૂની મહેફિલ માણતા ધનાઢ્ય પરિવારના 15 યુવકો અને 10 યુવતીઓ ઝડપી પાડી.
આંકલાવના માનપુરા ગામના ગ્રીન ટોન ખાનગી ફાર્મ હાઉસમાંથી પોલીસે દારૂની મહેફિલ ઝડપી પાડી છે. ફાર્મ હાઉસમાં બર્થડે પાર્ટીની આડમાં દારૂની મહેફિલ ચાલી રહી હતી. દારૂની આ મહેફિલમાં ધનાઢ્ય પરિવારના 15 યુવકો અને 10 યુવતીઓ ઝડપાઈ છે. આ સાથે પોલીસે દરોડામાં દારૂની 10 બોટલો પણ જપ્ત કરી છે. તમામ આરોપીઓની આંકલાવ પોલીસે ધરપકડ કરી લીધી છે. જો કે પકડાયેલા તમામ નબીરાઓ વડોદરાનાં રહેવાસી હોવાનું પોલીસની પ્રાથમિક તપાસમાં સામે આવ્યું છે.
માહિતી મુજબ આ પાર્ટી કોઇ મહિલાના જન્મદિવસ નિમિતે રાખવામાં આવી હોવાનું જાણવા મળી રહ્યું છે. માનપુરા ગામના ગ્રીનટોન ફાર્મ હાઉસને ભાડે રાખી આ પાર્ટીનું આયોજન કરવામાં આવ્યું હતું. જો કે પાર્ટી દરમ્યાન પોલીસ આવી જતા તમામ નબીરાઓના રંગમાં ભંગ પડ્યો હતો. પોલીસે દારૂના નશામાં ચકચુર 10 યુવતીઓ સહિત 25 લોકોની પોલીસે અટકાયત કરી છે. આ સાથે જ દારુની 10 બોટલો પોલીસે જપ્ત કરી લીધી છે. જેમાં 3 બોટલો ભરેલી, 5 બોટલો ખાલી અને 2 અડધી બોટલો પોલીસે જપ્ત કરી લીધી છે. ત્યારે પ્રોહિબિશનના ગુના અંતર્ગત આંકલાવ પોલીસે હાલ ગુનો દાખલ કરીને આ ઘટનાને લઇ આગળની કાર્યવાહી હાથ ધરી છે.
