ફ્લાયદુબઈની દુબઈથી તેલ અવીવ જતી ઉડાનમાં બનેલી ગંભીર ઘટના બાદ પાઇલટોના વર્તન અને તેમની વિચારધારાને સમજવા માટે નવી મૂલ્યાંકન પદ્ધતિ આવશ્યકતા હોવાનું મહત્વપૂર્ણ નિવેદન ભારતીય વાયુસેનાના નિવૃત્ત પાઇલટ અને વરિષ્ઠ વિમાન કમાન્ડર વિંગ કમાન્ડર પ્રશાંત કરડેએ આપ્યું છે.
૩૭ વર્ષમાં ૧૬ હજારથી વધુ કલાક ઉડાનનો અનુભવ ધરાવતા કરડેએ જણાવ્યું કે પાઈલટોની પસંદગી પ્રક્રિયા કડક હોવા છતાં વ્યક્તિની વિચારધારા ઉગ્રતાવાદી વલણને સમજવું મુશ્કેલ છે.
કરડેએ જણાવ્યું હતું કે ઉડ્ડયન ક્ષેત્રમાં કામગીરી સાથે નજીકથી સંકળાયેલા પાઈલટો અને અન્ય કર્મચારીઓના વર્તન તથા વલણનું મૂલ્યાંકન અને સતત દેખરેખ રાખવા માટે નવી વ્યવસ્થા સમયની જરૂરિયાત છે. ત્યાં સુધી ઉડ્ડયન ક્ષેત્ર સાથે સંકળાયેલા લોકોએ આસપાસના લોકો અને તેમના વર્તન અંગે સતર્ક, સક્રિય અને જવાબદાર રહેવું જરૂરી હોવાનું તેમણે કહ્યું હતું.ફ્લાયદુબઈની બોઇંગ ૭૩૭ મેક્સ ઉડાનમાં બનેલી આ ઘટનાએ વૈશ્વિક ઉડ્ડયન ક્ષેત્ર અને ખાસ કરીને પાઈલટ સમુદાયને હચમચાવી દીધો હોવાનું કરડેએ જણાવ્યું હતું. તેમના મતે ઉડ્ડયન સુરક્ષાનું બદલાતું સ્વરૂપ નિષ્ણાતોને સુરક્ષા વ્યવસ્થાઓ અંગે ફરી વિચારવા માટે મજબૂર કરશે.
કરડેએ કોકપિટ સુધી કથિત રીતે હથિયાર પહોંચવાની બાબત પર પણ સવાલ ઉઠાવ્યો હતો. તેમણે કહ્યું કે જો સ્વિસ નાઈફ કો-પાઇલટ દ્વારા અંદર લાવવામાં આવ્યું ન હોય તો એરપોર્ટ પર કોઈ સક્રિય ‘ડીપ સ્લીપર સેલ’ હોવાની શક્યતા અંગે પણ તપાસ જરૂરી બની શકે છે. જોકે, આ અંગે વધુ તપાસ બાદ જ સ્થિતિ સ્પષ્ટ થશે. તેમણે સંબંધિત લોકોની સુરક્ષા તપાસ વધુ ઊંડાણપૂર્વક કરવાની જરૂરિયાત પર ભાર મૂક્યો હતો. તેમણે જણાવ્યું કે વ્યાવસાયિક વિમાનોમાં સુરક્ષા સંબંધિત સાધનો અને વ્યવસ્થાઓ સતત વધુ વિશ્વસનીય બની રહી છે, પરંતુ હવે કોકપિટમાં રહેલા વ્યક્તિ પર પણ ધ્યાન કેન્દ્રિત કરવાની જરૂર છે. તેમના મતે તાજેતરની ઘટનાએ કોકપિટની સુરક્ષા અંગે નવા પ્રશ્નો ઊભા કર્યા છે. કરડેએ કોકપિટમાં રાખવામાં આવતી કટોકટીની કુહાડીનો પણ ઉલ્લેખ કર્યો હતો. તેમણે જણાવ્યું કે આગ જેવી કટોકટી માટે રાખવામાં આવતું આ હળવું વિશેષ સાધન પણ જોખમ ઊભું કરી શકે છે. ફ્લાયદુબઈની ઘટનાના સંદર્ભમાં કોકપિટ સુરક્ષા અને પાઈલટોના વર્તનનું વધુ વ્યાપક મૂલ્યાંકન કરવાની જરૂરિયાત અંગે ચર્ચા શરૂ થઈ છે.
