પાકિસ્તાનના કરાચીમાં ઠગો નોકરીની લાલચ આપીને ઓછામાં ઓછી 60 યુવતીઓના મોબાઇલ ફોન લઈને ફરાર થઈ ગયા. ઠગોએ સોશિયલ મીડિયા અને વોટ્સએપ ગ્રુપ દ્વારા તેમને એક કાર્યક્રમમાં સ્ટોલ સંભાળવાનું કામ આપ્યું હતું.યુવતીઓને 30 સપ્ટેમ્બરે કરાચીની બહાર આવેલા એક ફાર્મહાઉસમાં લઈ જવામાં આવી હતી, જ્યાં કંપનીની પોલિસી છે એવો હવાલો આપીને તેમના મોબાઇલ જમા કરાવી લેવામાં આવ્યા હતા. થોડા સમય બાદ ઠગો મોબાઇલથી ભરેલી બેગ લઈને બાઇક પર ફરાર થઈ ગયા.
સ્થાનિક પોલીસકર્મી મુહમ્મદ અલીએ જણાવ્યું કે તમામ યુવતીઓ નોકરીની શોધમાં હતી અને મધ્યમવર્ગીય પરિવારોમાંથી આવતી હતી.તેમને એક અઠવાડિયા સુધી કામ કરવા માટે દરરોજ 2,000 પાકિસ્તાની રૂપિયા અને અન્ય સુવિધાઓ આપવાનું વચન આપવામાં આવ્યું હતું.તેમને જણાવવામાં આવ્યું હતું કે કરાચીની બહાર આવેલી એક ગેટેડ કમ્યુનિટીમાં કાર્યક્રમ યોજાશે, જ્યાં તેમને સ્ટોલ લગાવવાના છે.
કાર્યક્રમના સ્થળે લઈ જવાને બદલે ફાર્મહાઉસ લઈ ગયા
એક પીડિતાએ જણાવ્યું કે મુખ્ય આરોપી અને તેનો સાથી સામાન્ય રીતે વર્ત્યા. તેમણે કહ્યું કે ફાર્મહાઉસમાં મહિલા કો-ઓર્ડિનેટર સાથે મુલાકાત થશે અને બપોરના ભોજન બાદ સૌને બેહરિયા ટાઉન લઈ જઈને સ્ટોલ લગાવવાના છે. ત્યારબાદ મુખ્ય આરોપીએ કંપનીની નીતિનો હવાલો આપીને તમામ છોકરીઓના મોબાઇલ જમા કરાવી લીધા. તેણે કહ્યું કે કામ પૂરું થયા બાદ ફોન પરત આપી દેવામાં આવશે. મુખ્ય આરોપી ગુજરાંવાલામાં છુપાયો મુહમ્મદ અલીએ કહ્યું કે આટલી મોટી સંખ્યામાં મોબાઇલ ફોન લઈને ફરાર થવાનો આવો મામલો તેમણે પહેલી વાર જોયો છે. પોલીસ મુખ્ય આરોપીની શોધ કરી રહી છે. પોલીસના જણાવ્યા અનુસાર, આરોપી કરાચીથી ભાગીને ગુજરાંવાલા ચાલ્યો ગયો છે. તેના બે ભાઈઓને પોલીસ સ્ટેશન લાવવામાં આવ્યા છે. બંનેએ ફોન પર તેની સાથે વાત કરી અને પોલીસ સમક્ષ આત્મસમર્પણ કરવા કહ્યું છે.
