ગરબા ગ્રાઉન્ડમાં મહિલાઓની મંજૂરી વગર છૂપી રીતે ફોટોગ્રાફી કે વીડિયોગ્રાફી કરનારાઓ સામે પોલીસ કાયદાનો પાઠ ભણાવશે. આ માટે પોલીસે તૈયારીઓ કરી લીધી છે. આ વખતે પણ પોલીસની શી ટીમ નોરતાના ટ્રેડિશનલ ડ્રેસમાં ચાંપતી નજર રાખશે. આ નવરાત્રિએ પોલીસ દ્વારા કડક કાર્યવાહી કરવામાં આવશે. પોલીસ દ્વારા બહાર પાડવામાં આવેલી જાહેરાત મુજબ ગરબાના સ્થળો, ખાસ કરીને એન્ટ્રી-એક્ઝિટ ગેટ, પાર્કિંગ એરિયા અને અંધારા વાળા રસ્તાઓ પર એન્ટિ-રોમિયો ડ્રાઈવ ચલાવવામાં આવશે. આ મહિલાઓની છેડતી કરનારા, પીછો કરનારા કે અયોગ્ય ટિપ્પણી કરનારા તત્વોને ઝડપી પાડવાનો મુખ્ય હેતુ છે.
પોલીસે મહિલાઓને પણ સતર્ક રહેવા અપીલ કરી છે. ફક્ત નવરાત્રિમાં સાથે ફરવા માટે સોશિયલ મીડિયા પર અજાણ્યા લોકોની ફ્રેન્ડ રિક્વેસ્ટ સ્વીકારવી નહીં, નવી ઓળખાણ પર આંખ બંધ કરીને વિશ્વાસ ન કરવો અને અજાણી વ્યક્તિ સાથે અવાવરુ સ્થળોએ જવાનું ટાળવું. આ ઉપરાંત, પરિવારનાં સભ્યો સાથે પોતાનું લાઈવ લોકેશન શેર કરવા સલાહ આપવામાં આવી છે. સાદા પોશાકમાં પોલીસ અને સરપ્રાઈઝ પેટ્રોલિંગ પણ કરશે. છેડતી કરનારાઓ અને રોમિયોગિરી કરનારાઓ પર નજર રાખવા માટે શી ટીમો સાદા કપડાંમાં તૈનાત રહેશે. આ સરપ્રાઈઝ ચેકિંગ માત્ર મોટા પાર્ટી પ્લોટ પૂરતું સીમિત નહીં રહે, પરંતુ શેરી ગરબા, મોહલ્લા, રજિસ્ટર્ડ સોસાયટીઓ અને ખાણી-પીણીની ગલીઓ સુધી લંબાવાશે.
પોલીસની સી ટિમ બહેનોને સુરક્ષા માર્ગદર્શન આપશે તેમજ સેલ્ફ ડિફેન્સ અને જાગૃતિ તાલીમ આપવા ઉપરાંત મોડી રાત્રે મુશ્કેલીમાં મુકાયેલી અથવા વાહન વ્યવસ્થા ન મળતી હોય તેવી મહિલાઓને 112 નંબર પર કોલ કરવા જણાવવામાં આવ્યું છે. ઈમરજન્સી રિસ્પોન્સ સિસ્ટમ અને શી ટીમ મહિલાઓ સુરક્ષિત ઘરે પહોંચે તે સુનિશ્ચિત કરશે.અને રોમિયોગિરી કરતા લોકોને સબક શીખવવામાં આવશે.
