ભારત સરકારે પોતાની સંરક્ષણ ક્ષમતાને વધુ મજબૂત બનાવવા માટે સૌથી મોટું પગલું ભર્યું છે. સંરક્ષણ પ્રધાન રાજનાથ સિંહની અધ્યક્ષતામાં રક્ષા અધિગ્રહણ પરિષની બેઠકમાં સેનાના ત્રણેય અંગો માટે અંદાજિત 2.12 લાખ કરોડના સંરક્ષણ સાધનો માટેની ખરીદીના પ્રસ્તાવને મંજૂરી આપવામાં આવી છે. આ પ્રસ્તાવોમાંથી આશરે 82 ટકા ખરીદી ભારતીય ઉદ્યોગો પાસેથી જ કરવામાં આવશે. આ નિર્ણયને કારણે સ્વદેશી ડિફેન્સ ઉત્પાદનને વેગ મળશે.
આ મંજૂરીથી ભારતીય સેનાને નવા ડ્રોન, હેલિકોપ્ટર, આધુનિક ટોપ સિસ્ટમ, અત્યાધુનિક ડિફેન્સ સિસ્ટમ અને સર્વેલન્સ ટેકનોલોજી મળવાનો માર્ગ મોકળો થયો છે. આ સાધનો સરહદ પર સેનાની દેખરેખ, દુશ્મનના હુમલાનો સામનો કરવાની ક્ષમતા અને ઓપરેશનલ તૈયારીઓને મજબૂત બનાવવામાં મદદ કરશે.
ભારતીય સેના માટે હાઇ મોબિલિટી વ્હીકલ્સ સેલ્ફ પ્રોપલ્ડ ટ્રેકડ ગન સિસ્ટમ, ગન શૉટ રિસ્પોન્સ સિસ્ટમ, લાઇટ મલ્ટી રોલ હેલિકોપ્ટર્સ અને વેરી શોર્ટ રેન્જ એર ડિફેન્સ સિસ્ટમની ખરીદીના પ્રસ્તાવોને મંજૂરી મળી છે. હાઇ મોબિલિટી વ્હીકલ્સ મુશ્કેલ અને દુર્ગમ વિસ્તારોમાં સૈનિકો તથા જરૂરી સામાનની અવરજવર સરળ બનાવશે. જ્યારે સેલ્ફ પ્રોપલ્ડ ટ્રેકડ ગન સિસ્ટમથી સેનાની તોપોની ગતિશીલતા અને ફાયરપાવર વધશે. ગન શૉટ રિસ્પોન્સ સિસ્ટમ સૈનિકોને ગોળીબાર ક્યાંથી થઈ રહ્યો છે તેની રિયલ-ટાઈમ માહિતી મેળવવામાં મદદ કરશે. આ ઉપરાંત નાના અને નવી પેઢીના હવાઈ જોખમોનો સામનો કરવા માટે વેરી શોર્ટ રેન્જ એર ડિફેન્સ સિસ્ટમ ખરીદવામાં આવશે. ટેન્કને ડ્રોનના હુમલાથી સુરક્ષિત રાખવા પકેટફોર્મ બેઝ્ડ કાઉન્ટર અનમેન્ડ એરિયલ સિસ્ટમ પણ સેનાની ક્ષમતામાં વધારો કરશે.
