હૈદરાબાદમાં નકલી નોટોનું કૌભાંડ,YouTube પરથી શીખ્યાં છાપકામ

યુટ્યુબ અને સોશિયલ મીડિયા પરથી ટ્યુટોરિયલ જોઈને નકલી ચલણી નોટો બનાવવાનું કૌભાંડ ચલાવતી એક શાતિર ગેંગનો તેલંગાણા પોલીસે પર્દાફાશ કર્યો છે. હૈદરાબાદના સરહદી વિસ્તારમાં ભાડાના મકાનમાં ધમધમતી નકલી નોટોની આ ફેક્ટરીમાંથી પોલીસે રૂપિયા 6.78 કરોડની નકલી ચલણી નોટો જપ્ત કરી 4 આરોપીઓની ધરપકડ કરી છે.
અબ્દુલ્લાપુરમેટ પોલીસ અને શાફીનગ૨ સ્પેશિયલ ઓપરેશન ટીમે નેશનલ હાઈવે 65 પર રામોજી ફિલ્મ સિટી નજીક એક કારને શંકાના આધારે રોકી હતી. કારની તલાશી લેતાં તેમાંથી રૂપિયા 8 લાખની કિંમતની 500 રૂપિયાના દરની નકલી નોટો મળી આવી હતી. પકડાયેલા આરોપીઓની સઘન પૂછપરછ બાદ પોલીસે કુંતલૂર વિસ્તારમાં આવેલ એક ભાડાના મકાન પર દરોડો પાડ્યો હતો. આ મકાનમાં નકલી નોટો છાપવાનું આખું યુનિટ ઊભું કરાયું હતું. સ્થળ પરથી 500ના દરના વધુ 134 નકલી નોટોના બંડલો મળી આવ્યા હતા,દરોડા દરમિયાન કલર પ્રિન્ટર્સ, સ્કેનર્સ, લેપટોપ, લેમિનેશન મશીન અને નોટ કાપવાના સાધનો પણ કબજે કરવામાં આવ્યાં છે.આખા રેકેટનો મુખ્ય સૂત્રધાર માડુપોજુ કરુણાકર છે. તેણે યુટ્યુબ વીડિયો અને અન્ય સોશિયલ મીડિયા પ્લેટફોર્મ પરથી નકલી નોટો કેવી રીતે પ્રિન્ટ કરવી તે શીખ્યું હતું.