ગુજરાતમાં વિધાનસભાની ચુંટણી ગાજી રહી છે. જે ને લઈને રાજકીય પક્ષોના નેતાના ગુજરાત પ્રવાસમાં પણ મોટા પાયે ઉછાળો આવી રહ્યો છે. જેના ભાગરૂપે વધુ એક વખત કેન્દ્રીય ગૃહમંત્રી અમિત શાહ ગુજરાતની મુલાકાતે આવ્યા છે. તેવામાં ગૃહમંત્રી અમિત શાહની અધ્યક્ષતામાં બેઠકોનો દૌર જામ્યો છે. દિવસભર 4 અલગ અલગ બેઠકો યોજાઇ છે.
વિધાનસભા ચૂંટણીને લઇ ગુજરાતમાં રાજકીય ગરમાવો આવ્યો છે. ચૂંટણીના ભણકારા વચ્ચે કમલમ ખાતે બેઠકો યોજાઇ રહી છે. ત્યારે ભાજપ દ્વારા ગૃહમંત્રી અમિત શાહની અધ્યક્ષતામાં 4 અલગ અલગ બેઠકનું આયોજન કરવામાં આવ્યું હતું. જેમાં રાષ્ટ્રીય સંગઠન મહામંત્રી પણ હાજર રહેશે. પ્રથમ બેઠકમાં પાંચ મહામંત્રીઓ સાથે ચર્ચા કરાઇ હતી. બેઠકમાં અત્યાર સુધીની કામગીરીની સમીક્ષા કરવામાં આવી હતી. જેમાં પ્રત્યેક વિધાનસભાના પેજ સમિતિ અંગે ચિતાર મેળવ્યો હતો. ઉપરાંત બીજી બેઠક કોષાધ્યક્ષ અને સહ કોષાધ્યક્ષ સાથે યોજાઇ હતી. ઉપરાંત ત્રીજી બેઠક પ્રદેશ ભાજપની કોર કમિટી સાથે યોજાઇ હતી.
આ બેઠકમાં આગામી દિવસોમાં ભાજપની ચૂંટણીલક્ષી કામગીરી અંગે સમીક્ષા કરવામાં આવી હતી. તથા 2022માં ભાજપના ગ્રાઉન્ડ અંગે સમીક્ષા કરાઇ હતી. ઉપરાંત ભાજપની કોર કમિટી સાથે વર્તમાન સ્થતિ અંગે ચિતાર મેળવ્યો હતો. અંતમાં ચોથી બેઠક 182 વિધાનસભાના પ્રભારીઓ સાથે યોજાઇ હતી. તેમાં વર્તમાન પરિસ્થિતિ અને કામગીરી અંગે સમીક્ષા કરવામાં આવી હતી. ઉલ્લેખનીય છે કે PM મોદીના પ્રવાસ બાદ ગૃહમંત્રી અમિત શાહ દ્વારા ગુજરાતમાં મહત્વપૂર્ણ બેઠક કરવામાં આવી રહી છે. કમલમ ખાતે બેઠકમાં વિધાનસભાની ચૂંટણીની રણનીતિ અંગે ચર્ચા કરાઇ રહી છે તથા ચૂંટણી અને પ્રચારના મુદ્દાઓને આખરી ઓપ અપાઇ રહ્યો છે.
