જેસર તાલુકાના ભાણવડીયા ગામે આજે સવારે મજુરી કામે જતી યુવતી પર એકતરફી પ્રેમમાં પાગલ ગામના જ યુવાને રસ્તામાં જ આંતરી લોખંડના પાઇપ ફટકારી હત્યા કરી નાસી છુટ્યાનો બનાવ બનતા ચકચાર મચી જવા પામી છે. ટૂંક સમયમાં જ જેસર તાલુકામાં બીજી હત્યા થતા ખળભળાટ મચી જવા પામ્યો છે.
બનાવ અંગે સુત્રો પાસેથી મળતી વિગતો મુજબ જેસર તાલુકાના ભાણવડીયા ગામે રહેતી ચંદ્રિકાબેન મનુભાઇ ગોહેલ (ઉ.વ.૨૩) તથા તેની સાથે ચારેક યુવતીઓ આજે સવારે તેઓના ઘરેથી મજુરી કામે જવા નીકળી હતી ત્યારે રસ્તામાં જ અશ્વીન ચુડાસમા નામનો ગામનો જ યુવાન ચંદ્રિકાના એકતરફી પ્રેમમાં પાગલ હોય તેણે યુવતીઓનો રસ્તો આંતરી તેની પાસે રહેલ લોખંડના પાઇપ વડે યુવતીઓને મારવા લાગેલ આથી બે યુવતીઓને ઇજા થઇ હતી. જ્યારે ચંદ્રિકાને માથાના તથા છાતીના ભાગે લોખંડના પાઇપ ફટકારી હત્યા કરી નાસી છુટ્યો હતો. યુવતીઓ પર થયેલા અચાનક હુમલાથી તેઓ ડઘાઇ ગઇ હતી. બનાવ અંગે તુરંત જ ગ્રામજનોને જાણ થતા લોકોના ટોળા એકઠા થઇ ગયા હતાં.
આ અંગે પોલીસને જાણ કરાતા મોટા ખુંટવડા પોલીસ સ્ટેશનનો કાફલો ઘટના સ્થળે દોડી આવ્યો હતો અને જરૂરી કાગળો તૈયાર કરી યુવતીની લાશને પી.એમ. અર્થે મહુવા હોસ્પિટલ ખસેડાઇ હતી. બનાવ અંગે મૃતક યુવતીની સાથે રહેલી અન્ય યુવતીઓએ ઘટના અંગેનું મીડિયા સમક્ષ વર્ણન કર્યું હતું અને અશ્વીન નામનો શખ્સ છેલ્લા કેટલાય દિવસથી ટોર્ચર કરતો હોવાનું પણ જણાવ્યું હતું. આ અંગે પોલીસે ફરિયાદ નોંધવાની તજવીજ હાથ ધરી છે.
