ભાજપે હાથ ધરી 2024ની લોકસભા ચૂંટણીની તૈયારીઓ

ભારતીય જનતા પાર્ટીએ 2024ની લોકસભા ચૂંટણીને ધ્યાને રાખીને અત્યારથી તૈયારીઓ હાથ ધરી છે, જે અંતર્ગત સમગ્ર દેશમાં ભાજપે ચૂંટણી પ્રભારીઓની નિમણૂંક કરી છે. જેમાં ગુજરાતમાંથી વિજય રુપાણીને પંજાબના પ્રભારી બનાવ્યા છે. આ સાથે બિહાર પ્રભારી વિનોદ તાવડેને પ્રભારી, જ્યારે હરીશ દ્વિવેદદીને સહપ્રભારી બનાવ્યા છે. ઓમ માથુર છત્તીસગઢના પ્રભારી બનાવ્યા છે. નિતિન નવીન સહ પ્રભારી બનાવ્યા છે. હરિયાણાના પ્રભારી વિપ્લવ દેવ, ઝારખંડના લક્ષ્મીકાંત બાજપેઈ, કેરલના પ્રકાશ જાવડેકર, મધ્ય પ્રદેશના મુરલીધર રાવ, પંજાબના વિજય રુપાણી, તેલંગણાના તરુણ ચુગ, રાજસ્થાનના અરુણ સિંહ, ત્રિપુરાના મહેશ શર્મા અને પશ્ચિમ બંગાળના મંગલ પાંડે પ્રભારી બનાવ્યા છે. તો વળી સમગ્ર ઉત્તર પૂર્વ રાજ્યોના સંયોજક સંબિત પાત્રાને બનાવ્યા છે.
ગુજરાત વિધાનસભા ચૂંટણીમાં ભાજપે ઐતિહાસિક જીત મેળવી છે. હવે વાત છે લોકસભા ચૂંટણીની. તો હવે ગુજરાતમાં 156 બેઠકો જીત્યા બાદ ગુજરાતની 26 લોકસભા બેઠકોમાં ભાજપને હેટ્રિક કરવામાં કોઇ મુશ્કેલી નડે તેવું લગભગ નથી. આગામી 2024ની લોકસભા ચૂંટણીમાં ભાજપના 26 ઉમેદવારો મોટી સરસાઇથી જીતી જાય તેવી સ્થિતિ હાલ બની છે.
આગામી 2024માં લોકસભાની ચૂંટણી યોજાવાની છે. જેમાં ગુજરાત ભાજપના 26 ઉમેદવારોની જીત એ ગઇકાલે આવેલા પરિણામ બાદ લગભગ સ્પષ્ટ થઈ ચૂકી છે. જોકે હવે પછી યોજાનારી અન્ય રાજ્યોની વિધાનસભા ચૂંટણીઓ પણ ભાજપે ગુજરાતમાં અજમાવેલા સંગઠનના મોડલનો પ્રયોગ દોહરાવી શકે છે. તેનાથી ફાયદો એ થશે કે, ફરીથી મોટી સંખ્યાની બેઠકો પર ભાજપ કબ્જો કરી શકે છે.
રાજ્યસભાની વાત કરીએ તો રાજ્યસભાની 11 પૈકી ત્રણ બેઠકો હાલ કોંગ્રેસ પાસે છે. પરંતુ રાજ્યસભાની ચૂંટણીમાં વિધાનસભાના ધારાસભ્યોના મત ગણતરીમાં લેવાતા હોવાથી હવે ભાજપ આ તમામ 11 બેઠકો આવનારા સમયમાં પોતાની પાસે લઇ લેશે. ગત ચૂંટણીમાં કોંગ્રેસે 77 બેઠકો મેળવી હતી એટલે તે સમયે ત્રણ બેઠકો મળી હતી. ગઇકાલે આવેલા પરિણામોને જોતા હવે આવનારા પાંચ વર્ષ માટે કોંગ્રેસને ગુજરાતમાંથી રાજ્યસભાના એક પણ સાંસદ નહીં મળે.