ભાવનગરના ચિત્રા, બેંક કોલોનીમાં આવેલ પ્રોવિઝન સ્ટોરના દુકાનદાર ઉપર પાઇપ વડે હુમલો કરી ચાર શખ્સોએ રોકડ રકમની લૂંટ ચલાવી ફરાર થઈ ગયા હતા.
આ બનાવ અંગે મળતી વિગતો મુજબ ભાવનગરના ચિત્રા, બેંક કોલોનીમાં આવેલ ભવનાથ મંદિરની પાછળ રહેતા ગંભીરભાઈ વશરામભાઈ રાઠોડ ( ઉં. વ. ૫૨ ) ગઈ તા. ૪/૧ ના રોજ રાત્રિના ૧૦ વાગે તેમની મહાદેવ પ્રોવિઝન નામની દુકાન બંધ કરીને ઘરે જતા હતા ત્યારે આ જ વિસ્તારમાં રહેતા વિવેક ઉર્ફે મોત શંભુભાઈ મકવાણા, રાહુલ પ્રકાશભાઈ, રાહુલનો ભાઈ અને ચિરાગ નામના શખ્સે આવીને ગંભીરભાઈ પાસે પૈસા માંગ્યા હતા. ગંભીરભાઈએ પૈસા આપવાની ના કહેતા શખ્સોએ ગંભીરભાઈ ઉપર લોખંડના પાઇપ વડે હુમલો કરી તેમના ખિસ્સામાં રાખેલા દુકાનના હિસાબના રૂ.૧,૯૮૦ રોકડાની લૂંટ કરી જાનથી મારી નાખવાની ધમકી આપી ફરાર થઈ ગયા હતા. હુમલાની ઘટનામાં ઇજાગ્રત ગંભીરભાઈ રાઠોડને સારવાર અર્થે હોસ્પિટલ ખસેડવામાં આવ્યા હતા.
આ બનાવ અંગે ગંભીરભાઈ રાઠોડએ બોરતળાવ પોલીસ મથકમાં ચારેય ઈસમો વિરુદ્ધ ફરિયાદ નોંધાવતા પોલીસે તપાસ હાથ ધરી હતી.
