ગુજરાતમાં કમોસમી વરસાદની એન્ટ્રીથી ખેડૂતોના જીવ પડીકે બંધાયા છે. હવામાન વિભાગે અગાઉ જ કમોસમી વરસાદની આગાહી કરી હતી. જોકે કડકડતી ઠંડીની વચ્ચે પણ વરસાદ આવતા રોગચાળો ફેલાય તેવી પણ એક સંભવના રહેલી છે. જોકે છેલ્લા 24 કલાકમાં આવેલા કમોસમી વરસાદે ખેડુતોની ચિંતામાં વધારો કર્યો છે. જોકે હવે વાદળછાયું વાતાવરણ હટે અને પાકને સુર્યપ્રકાશ મળે તો પાકને જીવતદાન મળી શકે.
મહેસાણા જિલ્લામાં પણ ફરી વરસાદી માહોલ સર્જાયો હતો. જેથી ખેડૂતો માથે ઉપાધિના વાદળો ઘેરાયા હતા. જિલ્લામાં સવારથી ગોરંભાયેલા વાદળો વચ્ચે સાંજના સમયગાળા દરમિયાન કમોસમી વરસાદ ધીમીધારે શરૂ થયો હતો.ખેતીને ભારે નુકશાનની ભીતિ હોવાથી ખેડૂતોને રાતે પાણીએ રોવાનો વારો આવ્યો છે.
શિયાળાની સીઝન હાલ પિક પર છે આવી સ્થિતિ વચ્ચે હવામાન વિભાગ દ્વારા રાજ્યના અમુક વિસ્તારોમાં કમોસમી વરસાદની આગાહી કરાઈ હતી. જેને લઈને ગઈકાલે કચ્છ, બોટાદ, સાબરકાંઠા, અમરેલી, જામમગર સહિતના વિસ્તારોમાં વરસાદ પડ્યો હતો. ત્યારબાદ પણ કમોસમી વરસાદનો કહેર યથાવત રહેવા પામ્યો હતો. મહત્વનું છે કે એક બાજુ લગ્નગાળાની સિઝનને લઈને રાજ્યમાં અનેક પરિવારોને ત્યા લગ્નનો રૂડો અવસર છે. આવી સ્થિતી વચ્ચે માવઠાએ મોકણ સર્જતાં યજમાનોને દોડાદોડી થઈ પડી હતી.
