તુર્કીયેમાં આવેલા ભૂકંપમાં હજારો લોકોના મોત થયા હતા. લાખો લોકો બેઘર બન્યા અને લગભગ એટલા જ લોકો ઘાયલ થયા હતા. આ તરફ છેલ્લા ઘણા દિવસોથી ત્યાં સતત બચાવ કામગીરી ચાલી રહી છે. આ બધાની વચ્ચે ભારતના નેશનલ જિયોફિઝિકલ રિસર્ચ ઈન્સ્ટિટ્યૂટના મુખ્ય વૈજ્ઞાનિકે ઉત્તરાખંડમાં પણ ભૂકંપની ચેતવણી આપી છે. તેમનું કહેવું છે કે, તુર્કીયેની તીવ્રતાનો ભૂકંપ ઉત્તરાખંડમાં પણ આવી શકે છે. આ તરફ ભૂકંપની ચેતવણીને પગલે હવે ટુર ઓપરેટરોનેએ પેકેજ રદ્દ કરવાના ફોનની સંખ્યા વધી હોવાનું સામે આવ્યું છે.
નેશનલ જિયોફિઝિકલ રિસર્ચ ઈન્સ્ટિટ્યૂટના મુખ્ય વૈજ્ઞાનિક ડૉ.એન.પૂર્ણચંદ્ર રાવે જણાવ્યું હતું કે, ઉત્તરાખંડ પ્રદેશમાં સપાટીની નીચે ઘણો તણાવ ઊભો થઈ રહ્યો છે અને તણાવને દૂર કરવા માટે ભૂકંપ જરૂરી બની જાય છે. જોકે તેમણે કહ્યું કે, ભૂકંપની તારીખ અને સમયની આગાહી કરી શકાતી નથી.
