છેલ્લા કેટલાક સમયથી એલન મસ્ક અને ટિ્વટરની ‘બ્લૂ ટિક’ વિવાદમાં છે ત્યારે ફરી એક આશ્ચર્યજનક ઘટનાક્રમમાં લાખો ફોલોઅર્સ ધરાવતા હાઇ-પ્રોફાઇલ સેલિબ્રિટી ટિ્વટર એકાઉન્ટ્સને ‘બ્લૂ ટિક’ પરત કરવામાં આવી છે. તાજેતરમાં જ ટિ્વટરે સબસ્ક્રિપ્શન નહીં ચૂકવનારા યુઝર્સની ‘બ્લૂ ટિક’ હટાવી દીધી હતી.
ભારતની ઘણી જાણીતી હસ્તીઓ માટે આ નિર્ણય મહત્વનો છે. કારણ કે ‘બ્લૂ ટિક’ માટે સબસ્ક્રિપ્શન નહીં ચૂકવનારા શાહરૂખ ખાન, સલમાન ખાન, રાહુલ ગાંધીના ટિ્વટર એકાઉન્ટમાંથી ચાલુ સપ્તાહે બ્લૂ ટિક હટી ગઈ હતી. જો કે, ટિ્વટરે જાણીતી હસ્તીઓના એકાઉન્ટમાં ‘બ્લૂ ટિક’ આપવાનું શરૂ કર્યું છે. ક્રિકેટર્સ સચિન તેંદુલકર અને વિરાટ કોહલીને ટિ્વટર હેન્ડલ પરથી ગુમ થયેલી બ્લૂ ટિક પરત આવી ગઈ છે. જો કે, હજુ એ સ્પષ્ટ નથી કે આ યુઝર્સે સબસ્ક્રિપ્શન ફી ચૂકવી છે કે નહીં. જમ્મુ-કાશ્મીરના ભૂતપૂર્વ મુખ્યમંત્રી ઓમર અબ્દુલ્લાને પણ બ્લૂ ટિક પરત મળી છે. તેમણે કોઇ સબસ્ક્રિપ્શન નહીં ચૂકવ્યું હોવાની સ્પષ્ટતા કરી હતી. નોબેલ વિજેતા મલાલા યુસફઝઇએ પણ ટિ્વટર પર બ્લૂ ટિક પરત મળતા આશ્ચર્ય અને ખુશી વ્યક્ત કર્યા હતા. તેમણે ટિ્વટ કર્યું હતું કે, “મને ખબર નથી શું થયું છે પણ મારી બ્લૂ ટિક પરત મળતા હું ખુશ છું. હવે બધાંને જાણ થશે કે હું હજુ પણ મલાલા છું.”
ટિ્વટરે બ્લૂ ટિક પરત કરવા અંગે હજુ કોઇ સત્તાવાર જાહેરાત કરી નથી. કંપનીએ મોટી સંખ્યામાં ફોલોઅર્સ ધરાવતા એકાઉન્ટ્સની બ્લૂ ટિક પરત કરવાનું ચાલુ કર્યું છે એવું મનાય છે. રસપ્રદ વાત તો એ છે કે અત્યારે દુનિયમાં નથી એવા માઇકલ જેક્સન, ચેડવિક બોસમેન અને કોબ બ્રાયન્ટ જેવા ગ્લોબલ સેલિબ્રિટીઝના એકાઉન્ટને પણ બ્લૂ ટિક પરત મળી છે. ઉલ્લેખનીય છે કે, ટિ્વટરે ચાલુ સપ્તાહે જ સબસ્ક્રિપ્શન નહીં ભરનારની બ્લૂ ટિક હટાવી હતી.
