ભાવનગર તા.૨
ભાવનગરના ફુલસર વિસ્તારમાં રહેતા મૂળ ભાંખલ ગામના શખ્સને નીલમબાગ પોલીસે ચોરી કરેલ ૧૧ બાઈક અને સ્કૂટર સાથે ઝડપી લઇ કાયદેસર કાર્યવાહી હાથ ધરી હતી. આ શખ્સ અગાઉ પણ ચોરીના ગુનામાં ઝડપાયો હોવાનું નિલમબાગ પોલીસે જણાવ્યું હતું.
નીલમબાગ પોલીસ કાફલો શહેરના નિલમબાગ સર્કલ પાસે પેટ્રોલિંગમાં હતો તે દરમિયાન નંબર પ્લેટ વગરના કાળા કલરના હીરો સ્પ્લેન્ડર પ્લસ મોટરસાયકલ લઈને નીકળેલા મિલન લક્ષ્મણભાઈ રાઠોડ ( રહે. મુખ્યમંત્રી આવાસ યોજના, ફુલસર ગામ, મૂળ રહે. ભાંખલ,તા. શિહોર ) ને અટકાવીને બાઈક અંગે પૂછપરછ કરતા આ બાઈક ચોરી કરેલ હોવાનું ખુલ્યું હતું.
પોલીસ પૂછપરછમાં તેણે આ બાઈક ઉપરાંત ૧૧ જેટલા બાઈક અને સ્કૂટર ભાવનગરની સર ટી. હોસ્પિટલ, બોરતળાવ, ગંગાજળિયા તળાવ, સિહોરના રેલ્વે સ્ટેશન તેમજ બસ સ્ટેશન આજુબાજુના વિસ્તારમાંથી છેલ્લા એક વર્ષ દરમિયાન ચોરી કરેલા હોવાનું જણાવતા પોલીસે ૧૧ બાઈક અને સ્કૂટર તેમજ બે ટાયર મળી કુલ રૂ.૨,૭૪,૦૦૦ ના મુદ્દામાલ સાથે તેની ધરપકડ કરી હતી. ઝડપાયેલો મિલન રાઠોડ અગાઉ પણ ચોરીના ગુનામાં નીલમબાગ પોલીસના હાથે ઝડપાયો હોવાનું જાણવા મળેલ છે.
વાહન ચોરીના ગુનામાં ઝડપાયેલ મિલનને ગેરેજનું કામકાજ ફાવતું હોય તે ભીડભાડવાળી જગ્યા તથા વધારે વાહનો પાર્ક કરેલ હોય તેવી જગ્યાની રેકી કરી હેન્ડલ લોક ન હોય તેવા સ્કૂટર કે મોટર સાયકલને દોરવીને થોડે દૂર લઈ ગયા બાદ વાહન ચાલુ કરી ફરાર થઈ જતો હોવાનું પોલીસ તપાસમાં ખુલ્યું હતું.
