દેશમાં સૌથી મોટી પાર્ટી ભાજપ અને કોંગ્રેસ બે જ છે. પરંતુ વિશ્લેષણમાં એવુ બહાર આવ્યું છે કે આ બન્ને પક્ષો કરતા પણ વધુ ધારાસભ્યો પ્રાદેશીક પક્ષો પાસે છે. રાષ્ટ્રીય પાર્ટીઓ સિવાયનાં પ્રાદેશીક પક્ષોના ધારાસભ્યોની કુલ સંખ્યા ચકાસવામાં આવે તો તે 1600 થી વધુ છે.છેલ્લા પાંચ વર્ષ પર નજર કરવામાં આવે તો રાજયોમાં ભાજપની તાકાત ઘટી છે.
આગામી વર્ષે યોજાનારી લોકસભાની સામાન્ય ચુંટણી પૂર્વે તમામ રાજકીય પક્ષ પોતપોતાની તાકાત વધારવાની તૈયારીમાં લાગી ગયા છે.કયાં રાજયમા કયો પક્ષ મજબુત છે અને કોની સાથે જોડાણથી ફાયદો થાય તેના ગણિત મંડાવા લાગ્યા છે અને એક વિશ્લેષણમાં એવુ જાહેર થયુ છે કે પ્રાદેશીક પક્ષોની તાકાત જ સૌથી વધુ છે અને તે કારણે ભાજપનું ટેન્શન વધી રહ્યું છે. છેલ્લા પાંચ વર્ષોની રાજયોની ચૂંટણીઓ તથા ધારાસભ્યોની સંખ્યા પર નજર કરવામાં આવે તો ભાજપ પાસે 1312 ધારાસભ્યો છે,કોંગ્રેસ પાસે આ સંખ્યા 770, ડાબેરીઓ પાસે 116, આમ આદમી પાર્ટી પાસે 161, તથા બસપા પાસે 15 છે. અન્ય પ્રાદેશીક પક્ષોના ધારાસભ્યોની સંખ્યાનો સરવાળો 1679 થવા જાય છે.
દેશનાં 13 રાજયો એવા છે જયાં અન્ય પક્ષો કરતાં ભાજપ-કોંગ્રેસનાં ઓછા ધારાસભ્યો છે.આ રાજયોમાં પ્રાદેક્ષીક પક્ષોનો જ દબદબો છે અને દેશની 50 કરોડ જેટલી વસ્તીનો તેમાં વસવાટ છે.આ રાજયોમાં બિહાર, બંગાળ, તામીલનાડુ, ઝારખંડ, મહારાષ્ટ્ર, આંધ્રપ્રદેશ, નાગાલેન્ડ, પુડુચેરી, મિઝોરમ તથા સિકકીમનો સમાવેશ થાય છે. આમ આદમી પાર્ટીની વાત કરવામાં આવે તો દિલ્હી અને પંજાબમા આપના 92 તથા દિલ્હીમાં 62 ધારાસભ્યો છે.
કેરાળામાં ડાબેરીનો દબદબો છે અને 97 ધારાસભ્યો છે.વસતીના ધોરણે ગણતરી કરવામાં આવે તો 48.8 કરોડની વસતી પર ભાજપનો દબદબો છે.કોંગ્રેસ 24.4 કરોડની વસતીનું પ્રતિનિધિત્વ ધરાવે છે.જયારે પ્રાદેશીક પક્ષોનો દબદબો 55.4 કરોડની વસ્તી પર છે.બસપામાં 60 લાખ, આપનાં 45 કરોડ વસ્તી પર દબદબો છે. સૌથી વધુ વસતી ધરાવતા રાજય ઉતર પ્રદેશમાં ભાજપનું રાજ છે. સાત રાજયો એવા છે જયાં ભાજપ ધારાસભ્યોની સંખ્યા 50 કે તેથી વધુ છે. કોંગ્રેસ 4 રાજયોમાં 50 ટકાથી વધુ ધારાસભ્યો ધરાવે છે. 9 રાજયોમાં અન્ય પક્ષોની સરકાર છે.જયાં 80 ટકા ધારાસભ્યો તેના છે.રાજયોનાં ચૂંટણી પરીણામોનાં આધારે નજર કરવામાં આવે તો ભાજપ કરતા પ્રાદેશીક પક્ષો વધુ મજબુત છે.
