ભાજપ પ્રદેશ અધ્યક્ષ સી.આર પાટીલ, ધારાસભ્ય સંગીતાબેન પાટીલ, ધારાસભ્ય સંદીપ દેસાઈ સહિત અન્ય ધારાસભ્યો અને નેતા પર ગંભીર આક્ષેપો કરતી એક પત્રિકા તૈયાર કરી પેનડ્રાઈવથી ભાજપના મોટા નેતાઓ અને હોદ્દેદારો સુધી પહોંચાડવા મામલે સુરતના ધારાસભ્ય સંદીપ દેસાઈની ફરિયાદ બાદ કાર્યવાહી કરવામાં આવી છે. ક્રાઈમ બ્રાન્ચે ગણપત વસાવાના PA રાકેશ સોલંકીની ધરપકડ કરી છે. આ ઉપરાંત 2 કર્મચારી દીપુ યાદવ અને ખુમાનસિંહ પટેલની પણ ધરપકડ કરવામાં આવી છે.
ભાજપના પ્રદેશ અધ્યક્ષ સી.આર પાટીલ, મંત્રી મુકેશ પટેલ, ધારાસભ્ય સંગીતાબેન પાટીલ અને સંદીપ દેસાઈને બદનામ કરતી એક પેન ડ્રાઈવ અને પત્રો ફરતા કરાયા હતા. આ સમગ્ર મામલે ચોર્યાસીના ધારાસભ્ય સંદીપ દેસાઈએ ક્રાઈમબ્રાન્ચમાં અરજી આપી હતી. જે બાદ ક્રાઈમ બ્રાન્ચે ફરિયાદ નોંધી હતી.
તપાસમાં એવું સામે આવ્યું છે કે, રાકેશ સોલંકીએ પોતાની ઓફિસમાં પેનડ્રાઈવ તૈયાર કરી હતી. અન્ય બે પત્ર પણ પોતાની ઓફિસમાં જ કોમ્પ્યુટરમાં તૈયાર કરાવ્યા હતા. દીપુ યાદવ, ખુમાનસિંહે પેનડ્રાઈવ અને પત્રો નેતાઓને પોસ્ટ કર્યા હતા. પત્રો ભરૂચ તથા પાલેજથી જુદા જુદા નેતાઓને પોસ્ટ મારફતે મોકલવામાં આવ્યા હતા. ત્યારે હવે ક્રાઈમ બ્રાન્ચે ત્રણેયની ધરપકડ કરી વધુ તપાસ હાથ ધરી છે. રાકેશ સોલંકીએ કોના ઈશારે કામ કર્યુંએ દિશામાં ક્રાઈમ બ્રાન્ચ તપાસ કરી રહી છે. આગામી દિવસોમાં મોટા રાજકીય ધડાકા અને ખુલાસા થવાની શક્યતા છે.
