ડેન્ગ્યુનો રોગ વરસાદની મોસમમાં વ્યાપકપણે ફેલાય છે. બીજી તરફ કેરળમાં પણ નિપાહ વાયરસ ફેલાઈ રહ્યો છે. દરમિયાન, એક આશ્ચર્યજનક રોગ સામે આવ્યો છે જે નાના જંતુના ડંખને કારણે ફેલાઈ રહ્યો છે. આ જંતુના કરડવાથી થતા રોગને કારણે ઓડિશામાં 14 લોકોના મોત થયા છે. ઘાસમાં રહેતા આ જંતુને સ્ક્રબ ટાયફસ અથવા ચિગર્સ પણ કહેવામાં આવે છે. તેના ડંખ પછી, લક્ષણો લાંબા સમય પછી ખબર પડે છે, તેથી લોકો માટે બચવું મુશ્કેલ બની જાય છે. જો સમયસર સારવાર ન મળે અથવા લક્ષણો ખૂબ મોડેથી દેખાય તો, લોકો 15-20 દિવસમાં મૃત્યુ પામે છે.
ઓડિશાના સુંદરગઢમાં એક સાથે 30 લોકો સંક્રમિત જોવા મળ્યા અને કુલ સંક્રમિતોની સંખ્યા 162 પર પહોંચી ગઈ છે. રિપોર્ટ અનુસાર, આ ચેપ સામાન્ય રીતે જુલાઈથી નવેમ્બર વચ્ચે જોવા મળે છે. આ નાનો જંતુ ઘાસમાં રહે છે અને દેખાયા વગર જ કરડી જાય છે.
શું છે તેના લક્ષણો?
ચિગર્સ જંતુના કરડવાથી તાવ આવવાની સાથે જ ચક્કર આવે છે અને સ્નાયુમાં દુખાવો થાય છે. જો સમયસર લક્ષણો દેખાઈ જાય અને તેને સમજીને તેની યોગ્ય સારવાર કરવામાં આવે તો તે એટલું જોખમી નથી. જો કે, લક્ષણો સમજવામાં વિલંબ અને સારવાર ન મળવાથી સમસ્યાઓ થઈ શકે છે. ઘાસ ઉપરાંત, આ કીડો ઉંદરો, ખિસકોલી, સસલા અને અન્ય નાના પ્રાણીઓના શરીર પર પણ જોવા મળે છે.
સેન્ટર્સ ફોર ડિસીઝ કંટ્રોલ એન્ડ પ્રિવેન્શન મુજબ, સ્ક્રબ ટાઈફસને બુશ ટાઈફસ કહેવામાં આવે છે. જ્યાં આ જંતુ કરડે છે ત્યાં લાલ નિશાન પડી જાય છે અને ધીમે-ધીમે ચેપ આખા શરીરમાં ફેલાવા લાગે છે. આવી સ્થિતિમાં ડોકટરો વરસાદની મોસમમાં ઘાસવાળો વિસ્તાર ટાળવાની અને સ્વચ્છતાનું ખાસ ધ્યાન રાખવાની સલાહ આપે છે. જો લક્ષણો દેખાય, તો તરત જ ડૉક્ટરનો સંપર્ક કરો.
