સુરત રેલવે પોલીસ મથકના સુત્રો પાસેથી મળેલી જાણકારી અનુસાર, ટ્રેન મારફતે થતી ગાંજાની હેરાફેરી પર બાજ નજર રાખવા રેલ્વે એસઓજી અને એનડીપીએસ ડેડીકેટેડ ની ટીમ સુરત રેલ્વે સ્ટેશન વિસ્તારમાં પેટ્રોલિંગમાં હતી.આ સમયે સુરત રેલવે સ્ટેશનના પ્લેટફોર્મ નંબર એક ઉપર આવી પહોંચેલી પોરબંદર એક્સપ્રેસ ટ્રેનમાંથી મોટી સંખ્યામાં મુસાફરો ઉતરી રહ્યા હતા. જે ટ્રેનમાંથી ઉતરીને જતા મુસાફરો પર પોલીસની ટીમ દ્વારા બાજ રાખવામાં આવી હતી.
મુસાફરોની ભીડમાં એક વ્યક્તિ પોલીસને શંકાશીલ જણાઈ આવ્યો હતો. પોતાના ખભે હેન્ડબેગ અને હાથમાં બેગ ઉચકીને જતા આ મુસાફરને આંતરી તેની તલાશી લેવામાં આવી હતી.જે બેગમાં તપાસ કરતા પ્રતિબંધિત ગાંજાનો જથ્થો મળી આવ્યો હતો. ગાંજાના જથ્થા સાથે ઝડપાયેલા શખ્સની પૂછપરછ કરતા તેણે પોતાનું નામ રાજા સ્વેતા બીસોઈ હોવાનું જણાવ્યું હતું.જે ઓરિસ્સાના ગંજામ જિલ્લાના પાઈકરાપલ્લીનો વતની હોવાનું જાણવા મળ્યું હતું. તે ગાંજાનો જથ્થો ઓડિસ્સાથી લઈ ટ્રેન મારફતે સુરત આવ્યો હતો.જે ગાંજાનો જથ્થો સુરતમાં કોઈક ઇસમને ડિલિવરી કરવાનો હતો. પોલીસે આરોપી પાસેથી રૂપિયા 1.20 લાખની કિંમતનો 12.74 કિલોગ્રામ ગાંજાનો જથ્થો,મોબાઈલ,રોકડ રકમ સહિત 1.29 લાખની મત્તાનો મુદ્દામાલ કબ્જે કરી ધરપકડ કરી હતી.જ્યાં ગાંજાનો જથ્થો સુરતમાં ક્યાં અને કોણે સપ્લાય કરવાનો હતો તેની વધુ તપાસ સુરત રેલવે પોલીસને સોંપવામાં આવી છે.
12.74 કિલોગ્રામનો પ્રતિબંધિત ગાંજાના જથ્થા સાથે આરોપી ઝડપાયો
સુરત રેલ્વે સ્ટેશન પરથી 1.29 લાખની મત્તાનો મુદ્દામાલ કબ્જે કરી ધરપકડ
