ભારતે ઇતિહાસ રચ્યો, એશિયન ગેમ્સમાં 71 મેડલ જીતતા પોતાનો રેકોર્ડ તોડી નાખ્યો

એશિયન ગેમ્સમાં ભારતે ઇતિહાસ રચી દીધો છે. ભારતે એશિયન ગેમ્સમાં સૌથી વધુ મેડલ જીતવાનો પોતાનો રેકોર્ડ તોડી નાખ્યો છે. વર્ષ 2018માં ઇન્ડોનેશિયાના પાટનગર જકાર્તામાં આયોજિત એશિયન ગેમ્સમાં ભારતે કુલ 70 મેડલ જીત્યા હતા પરંતુ આ વખતે ભારત અત્યાર સુધી 71 મેડલ જીતી ચુક્યું છે. મહત્ત્વપૂર્ણ છે કે 4 ઓક્ટોબરે તીરંદાજીની કમ્પાઉન્ડ મિક્સ્ડ ટીમ ઈવેન્ટમાં ભારતે ગોલ્ડ મેડલ જીત્યો હતો. આ સાથે જ એશિયાડમાં ભારતે ઇતિહાસ રચતા 71મો મેડલ જીત્યો હતો.
એશિયન ગેમ્સની મહિલાઓની 5000 મીટર સ્પર્ધામાં ભારતની પારુલ ચૌધરીએ જોરદાર તાકાત બતાવી છે અને ગોલ્ડ જીત્યો છે. આ 28 વર્ષીય ખેલાડી છેલ્લા લેપમાં ટોચના બે ખેલાડીઓમાં સામેલ હતી અને પછી અંતિમ ક્ષણોમાં જાપાનની રિરીકા હિરોનાકાને પછાડીને 15 મિનિટ 14.75 સેકન્ડના સમય સાથે ગોલ્ડ મેડલ જીતવામાં સફળ રહી હતી. હાલમાં ચાલી રહેલી એશિયન ગેમ્સમાં પારુલનો આ બીજો મેડલ છે. તેણે મહિલાઓની 3000 મીટર સ્ટીપલચેસમાં સિલ્વર મેડલ પણ જીત્યો હતો.
અન્નુ રાનીએ એશિયન ગેમ્સમાં ગોલ્ડ મેડલ જીતીને ઈતિહાસ રચ્યો છે. તેના ચોથા પ્રયાસમાં, તેણે સિઝનનું સર્વશ્રેષ્ઠ પ્રદર્શન કર્યું અને 62.92 મીટર બરછી ફેંકી. તે ભાલા ફેંકમાં ગોલ્ડ મેડલ જીતનારી પ્રથમ ભારતીય મહિલા બની છે.