રહેણાંકી મકાનમાંથી ૧૭૦ બોટલ નશાકારક સિરપનો જથ્થો ઝડપાયો

આયુર્વેદિક સિરપના નામે વેચાતી કથિત નશાકારક સિરપ વિરૂધ્ધ કાયદેસર કાર્યવાહી કરવા ભાવનગર પોલીસ એલર્ટ બની છે. શુક્રવારે ભાવનગર શહેર જિલ્લામાં સિરપની બોટલ વેચતા શખ્સો સામે કડક કાર્યવાહી બાદ સતત પોલીસે આ દિશામાં કાર્યવાહી યથાવત રાખી છે. રવિવારે પણ ભાવનગર પોલીસના સ્પેશિયલ ઓપરેશન ગૃપે શહેરના અલ્કા ટોકિઝ નજીકના એક મકાનમાં દરોડો પાડી નશાકારક સિરપની ૧૭૦ જેટલી બોટલ કબ્જેે કરી હતી.
આ બનાવની વિગત પ્રમાણે રાજ્યના પોલીસ મહાનિદેશક અને મુખ્ય પોલીસ અધિકારી દ્રારા ગુજરાત રાજ્યમાં એ.ટી.એસ.ના માર્ગદર્શન હેઠળ નશાકારક પ્રવાહી, પદાર્થના ગેરકાયદેસર વેચાણ અને વહન અંગેના કેસો કરવા અને તેવા પદાર્થ, પ્રવાહી શોધી તેનું ગેરકાયદેસર વેચાણ કરતા શખ્સો સામે કાયદેસર કાર્યવાહી કરવા તમામ જિલ્લાના પોલીસ વડાને આદેશ આપ્યો છે. જેના પગલે ભાવનગર સ્પેશિયલ ગૂ્રપે બાતમીના આધારે શહેરના અલકા ટોકિઝ પાસે આવેલા જુસબ બાવાના ડેલા ખાતે રહેતા ઇલિયાસ પીરભાઇ કુરેશીના ઘરે દરોડો પાડયો હતો. જયાંથી પોલીસને સિરપની ૧૭૦ બોટલ રૂ.૨૫,૪૪૫નો મુદામાલ મળી આવ્યો હતો. પોલીસે આ મુદામાલને બરમાદ કરી આગળની કાર્યવાહી માટે નિલમબાગ પોલીસ મથક ખાતે સોંપી આપ્યો હતો.