નેશનલ હાઇ સ્પીડ રેલ કોર્પોરેશન લિમિટેડ (NHSRCL)એ કહ્યુ કે તેને ગુજરાત, મહારાષ્ટ્ર અને દાદરા અને નગર હવેલીમાં અમદાવાદ-મુંબઇ રેલ કોરિડોર માટે ભૂમિ અધિગ્રહણનું કામ 100 ટકા પૂર્ણ કરી લીધુ છે. અમદાવાદ-મુંબઇ રેલ કોરિડોરને બુલેટ ટ્રેન પરિયોજનાના રૂપમાં પણ ઓળખવામાં આવે છે.
રૂ. 1.10 લાખ કરોડનો પ્રોજેક્ટ 2022 સુધીમાં પૂર્ણ થવાની ધારણા હતી પરંતુ જમીન સંપાદન સંબંધિત અનેક અવરોધોનો સામનો કરવો પડ્યો હતો. સરકાર 2026 સુધીમાં દક્ષિણ ગુજરાતમાં સુરત અને બીલીમોરા વચ્ચે બુલેટ ટ્રેનનો પ્રથમ તબક્કો શરૂ કરવાનું લક્ષ્ય છે.
રેલ્વે મંત્રી અશ્વિની વૈષ્ણવે એક્સ પર ભૂમિ અધિગ્રહણની જાણકારી આપતા કહ્યું કે પરિયોજના માટે જરૂરી 1389.49 હેક્ટર જમીન અધિગ્રહણ કરી લેવામાં આવી છે. અમદાવાદ અને મુંબઇ વચ્ચે હાઇ સ્પીડ ધરાવતી રેલ લાઇનનું કામ ચાલી રહ્યું છે. NHSRCLએ જણાવ્યું હતું કે પ્રોજેક્ટ માટેના તમામ કોન્ટ્રાક્ટ ગુજરાત અને મહારાષ્ટ્રને આપવામાં આવ્યા હતા જ્યારે 120.4 કિમીના ગર્ડર નાખવામાં આવ્યા છે અને 271 કિમી સુધી થાંભલાઓ લગાવવામાં આવ્યા છે. MHRC કોરિડોર ટ્રેક સિસ્ટમ માટે જાપાનીઝ શિંકનસેનમાં ઉપયોગમાં લેવાતા રિઇનફોર્સ્ડ કોંક્રીટ (RC) ટ્રેક બેડ નાખવાનું કામ પણ સુરત અને આણંદમાં શરૂ થયું છે. ભારતમાં પહેલીવાર જે-સ્લેબ બેલાસ્ટલેસ ટ્રેક સિસ્ટમનો ઉપયોગ કરવામાં આવી રહ્યો છે.
NHSRCL એ જણાવ્યું કે માત્ર 10 મહિનામાં ગુજરાતના વલસાડ જિલ્લાના જરોલી ગામ પાસે 12.6 મીટર વ્યાસ અને 350 મીટર લંબાઈની પ્રથમ ‘માઉન્ટેન ટનલ’નું બાંધકામ પૂર્ણ કરવામાં આવ્યું છે. સુરત જિલ્લામાં નેશનલ હાઈવે પર 70 મીટર લાંબો અને 673 મેટ્રિક ટન વજન ધરાવતો પ્રથમ સ્ટીલ બ્રિજ બનાવવામાં આવ્યો છે. તેમજ આવા 28 માંથી 16 પુલનું બાંધકામ વિવિધ તબક્કામાં છે.
MAHSR કોરિડોર પરની 24 નદીઓમાંથી છ નદીઓ પર પુલનું બાંધકામ પૂર્ણ થયું છે, જેમાં પાર (વલસાડ જિલ્લો), પૂર્ણા (નવસારી જિલ્લો), મીંધોલા (નવસારી જિલ્લો), અંબિકા (નવસારી જિલ્લો), ઔરંગા (વલસાડ જિલ્લો) અને વેંગનિયા (નવસારી જિલ્લો)નો સમાવેશ થાય છે. નર્મદા, તાપ્તી, મહી અને સાબરમતી નદીઓ પર કામ ચાલી રહ્યું છે.
ભારતની પ્રથમ સાત કિલોમીટર લાંબી દરિયાની નીચે રેલ્વે ટનલ પર કામ શરૂ થઈ ગયું છે. આ ટનલ મહારાષ્ટ્રના બાંદ્રા કુર્લા કોમ્પ્લેક્સ અને શિલફાટા વચ્ચેની 21 કિલોમીટર લાંબી ટનલનો એક ભાગ છે અને મુંબઈ એચએસઆર સ્ટેશનના નિર્માણ માટે ખોદકામનું કામ પણ શરૂ થઈ ગયું છે. NHSRCLએ જણાવ્યું હતું કે ગુજરાતમાં વાપી, બીલીમોરા, સુરત, ભરૂચ, આણંદ, વડોદરા, અમદાવાદ અને સાબરમતી ખાતેના HSR સ્ટેશનો બાંધકામના વિવિધ તબક્કામાં છે.
