અયોધ્યામાં રામલલાના અભિષેક સમારોહને બે શંકરાચાર્યોનું સમર્થન મળ્યું છે. કાંચી અને શૃંગેરીના શંકરાચાર્યોનું કહેવું છે કે આ સમારોહ હિંદુ રીતિ-રિવાજો પ્રમાણે કરવામાં આવી રહ્યો છે. તેમણે પ્રાણ પ્રતિષ્ઠા સમારોહના વિરોધના દાવાઓને પણ ફગાવી દીધા છે. ખાસ વાત એ છે કે આ સમારોહ પર બે શંકરાચાર્ય અવિમુક્તેશ્વરાનંદ સરસ્વતી અને નિશ્ચલાનંદ સરસ્વતીએ પ્રશ્નો ઉઠાવ્યા હતા.
કાંચી કામકોટી મઠના વિજયેન્દ્ર સરસ્વતી સ્વામીગલે સમારોહની વિરુદ્ધ હોવાના દાવાને નકારી કાઢ્યા છે. તેમણે કહ્યું, ‘ભગવાન રામના આશીર્વાદથી 22 જાન્યુઆરીએ અયોધ્યામાં રામ મંદિર પ્રાણ પ્રતિષ્ઠા થશે. શૃંગેરીના શંકરાચાર્ય સ્વામી ભારતી તીર્થ મહારાજ પણ ઉજવણીના સમર્થનમાં છે. તેમણે કહ્યું કે આ સમારોહ સંપૂર્ણ હિંદુ ધાર્મિક વિધિઓ અનુસાર છે અને દેશના લોકોના પ્રતિનિધિ હોવાના કારણે મોદીને પૂજારીઓ દ્વારા નિર્ધારિત ધાર્મિક વિધિ કરવાનો અધિકાર છે. શ્રી શૃંગેરી શારદા પીઠમના ધર્માધિકારી દેવજન કે એન સોમયાજીએ કહ્યું કે એકવાર ગર્ભગૃહ પૂર્ણ થઈ જાય પછી સમારોહને લઈને કોઈ વિવાદ થવો જોઈએ નહીં.
વધુમાં તેમણે જણાવ્યું હતું કે, “બાંધકામ એક લાંબી પ્રક્રિયા છે, કેટલીકવાર તે બે થી ત્રણ પેઢીઓ સુધી ચાલુ રહે છે. જો કે, એકવાર ગર્ભગૃહ પૂર્ણ થઈ જાય, તેના પર કોઈ વિવાદ થવો જોઈએ નહીં. અયોધ્યામાં ગર્ભ ગૃહનું બાંધકામ પૂર્ણ થયું છે.” તેમણે કહ્યું કે હિંદુ પરંપરાઓ અનુસાર શુદ્ધિકરણની લાંબી પ્રક્રિયા બાદ મોદી ભગવાન રામની મૂર્તિને ઉઘાડા પગે ગર્ભગૃહમાં લઈ જશે. તેમણે એમ પણ કહ્યું, ‘આપણે એ ન ભૂલવું જોઈએ કે તેઓ સમગ્ર દેશના પ્રતિનિધિ તરીકે ત્યાં હાજર રહેશે.’
