અમેરિકામાં વધુ એક ભારતીયનું મોત, ટેક કંપનીના માલિકનું હુમલા બાદ મોત

વોશિંગ્ટનની એક રેસ્ટોરાંની બહાર ઝઘડો થયા બાદ ગંભીર રીતે ઘાયલ અવસ્થામાં મળી આવ્યા બાદ એક ભારતીય અમેરિકી નાગરિકનું મોત નીપજ્યું છે. પોલીસ અહેવાલ અનુસાર વર્જિનિયાના રહેવાશી વિવેક તનેજા 2 ફેબ્રુઆરીએ 2 સિસ્ટર્સ નામની જાપાની રેસ્ટોરાંમા ગયા હતા. ત્યાં એક શંકાસ્પદ વ્યક્તિએ તેને જમીન પર પાડી દીધો અને માથું ફૂટપાથ પર પછાડ્યું હતું. આ મામલો પણ ત્યારે સામે આવ્યો છે જ્યારે અમેરિકામાં એક પછી એક ભારતીય વિદ્યાર્થીઓના મૃત્યુ કે તેમના પર સતત હુમલા થઇ રહ્યા છે.
તાજેતરના કેસમાં આ હુમલામાં સંડોવાયેલા શંકાસ્પદ હુમલાખોરનો વીડિયો પણ સામે આવ્યો છે જેની શોધખોળ હાથ ધરવામાં આવી છે. 41 વર્ષીય વિવેક તનેજા રાતે 2 વાગ્યે રેસ્ટોરાંથી બહાર નીકળ્યો હતો અને તે જ સમયે નજીકના રોડ પર જ તેના પર આ હુમલો કરાયો. પોલીસે જણાવ્યું કે હજુ એ ખબર નથી પડી કે આ હુમલો કેમ કરાયો? હુમલા બાદ વિવેક બેભાન અવસ્થામાં ત્યાં જ ઢળી પડ્યો હતો. તેને ગંભીર ઈજાઓ થઇ હતી એટલા માટે ઉતાવળે હોસ્પિટલ રિફર કરી દેવાયો હતો. પોલીસે જણાવ્યું કે વિવેક તનેજાએ હોસ્પિટલમાં બુધવારે અંતિમ શ્વાસ લીધા હતા. સીસીટીવીના આધારે હવે તેના પર હુમલો કરનારા શંકાસ્પદ વ્યક્તિને શોધવામાં આવી રહ્યો છે. આ હુમલાખોરની હજુ સુધી કોઈ જાણકારી મળી શકી નથી.