હવામાન વિભાગના ડાયરેક્ટર એ.કે. દાસ દ્વારા આગાહી કરવામાં આવી છે કે હજુ પણ આગામી પાંચ દિવસ રાજ્યમાં ગરમીનો પ્રકોપ યથાવત્ રહેશે. ગુજરાતના ઉત્તર અને દક્ષિણ ભાગના દરિયાકાંઠાના વિસ્તારોમાં, એટલે કે, કચ્છના અખાત અને ખંભાતના અખાતમાં ઉત્તર-પશ્ચિમ દિશા તરફથી પવનો ફૂંકાયા હતા. આ સાથે જ 15થી 20 નોટ્સ પ્રતિ કલાકની ઝડપે પવનનો ફૂંકાયા હતા. હજુ પણ આગામી 24 કલાક દરમિયાન ગુજરાત પર દક્ષિણ પશ્ચિમથી પશ્ચિમ દિશા તરફથી પવનો ફૂંકાવાની શક્યતા છે. આગામી પાંચ દિવસ ગુજરાતના મહત્તમ તાપમાનમાં મોટો ફેરફાર ન આવતા મોટા ભાગના જિલ્લાઓનું મહત્તમ તાપમાન 42 ડિગ્રી સેલ્સિયસની આસપાસ રહે એવી શક્યતા છે.
વધુમાં તેમણે જણાવ્યું હતું કે આગામી પાંચ દિવસ દરમિયાન રાજ્યના વિવિધ જિલ્લાઓમાં એકથી બે ડિગ્રી સેલ્સિયસ તાપમાનમાં વધારો થઈ શકે છે. હાલમાં ભારતના ઉત્તરી વિભાગમાં વેસ્ટર્ન ડિસ્ટર્બન્સ અપ્રોચ કરી રહ્યું છે. ખાસ કરીને જમ્મુ-કાશ્મીરના વિસ્તારોમાં સાઇક્લોનિક સર્ક્યુલેશન સર્જાયું છે, પરંતુ હવામાન વિભાગની આગાહી અનુસાર ગુજરાત પર એની અસરો જોવા મળશે નહીં. ત્યાર બાદ પાંચથી સાત દિવસ પછી ફરી એક વખત વેસ્ટર્ન ડિસ્ટર્બન્સ ગુજરાતના ઉત્તરી વિભાગને અપ્રોચ કરશે. એને કારણે ગુજરાત પર એની અસર થશે કે નહીં એ હાલમાં સ્પષ્ટપણે કહી શકાય એમ નથી.
હવામાન વિભાગની આગાહી અનુસાર રાજ્યના તાપમાનમાં ધીમે ધીમે વધારો થઈ રહ્યો છે. રાજ્યના કેટલાક જિલ્લાનું મહત્તમ તાપમાન 41 ડિગ્રીની આસપાસ પહોંચી શકે છે એવી આગાહી કરવામાં આવી હતી.