રાજસ્થાનની રાજધાની જયપુરથી છેતરપિંડીનો એક ચોંકાવનારો કિસ્સો સામે આવ્યો છે. અહીં એક દુકાનદારે અમેરિકન મહિલાને 300 રૂપિયાની કિંમતની નકલી જ્વેલરી 6 કરોડ રૂપિયામાં વેચી હતી. અમેરિકન મહિલા ચેરીસે જયપુરના જોહરી બજારમાંથી ગોલ્ડન પોલિશમાં સિલ્વર જ્વેલરી ખરીદી હતી.
જ્યારે આ જ્વેલરી આ વર્ષે અમેરિકામાં એક પ્રદર્શનમાં બતાવવામાં આવી ત્યારે તે નકલી હોવાનું જાણવા મળ્યું હતું. આ પછી ચેરીસે ભારત આવીને દુકાનના માલિક ગૌરવ સોનીને તેની કૌભાંડ જણાવ્યું હતું. જોકે, દુકાન માલિકે તેના આરોપોને નકારી કાઢ્યા હતા. આ પછી અમેરિકન નાગરિકે જયપુર પોલીસમાં ફરિયાદ નોંધાવી. તેણે જ્વેલરીને તેની શુદ્ધતા ચકાસવા માટે અન્ય દુકાનોમાં તાપસ કરાવી હતી. જ્યાં પરીક્ષણ બાદ જવેલરી નકલી હોવાની પુષ્ટિ થઈ હતી. આ પછી ચેરિસે અમેરિકન એમ્બેસીને આ ઘટના વિશે જાણ કરી.
18 મેના રોજ, જ્વેલર રાજેન્દ્ર સોની અને તેમના પુત્ર ગૌરવ સોની વિરુદ્ધ ભારતીય દંડ સંહિતાની કેટલીક કલમો હેઠળ FIR નોંધવામાં આવી હતી. આ કેસ વિશે મીડિયા સાથે વાત કરતા જયપુર પોલીસના ડીસીપી બજરંગ સિંહ શેખાવતે જણાવ્યું હતું કે, “પોલીસે દાગીના પરીક્ષણ માટે મોકલ્યા હતા, જાણવા મળ્યું હતું કે જ્વેલરીમાં હીરા ચંદ્રમણિના હતા. જ્વેલરીમાં સોનાનો જથ્થો 14 કેરેટ હોવો જોઈએ. “પરંતુ તે પણ બે કેરેટનો હતો. આરોપી જ્વેલર્સે એવી ફરિયાદ પણ નોંધાવી હતી કે મહિલા તેમની દુકાનમાંથી દાગીના લઈને ભાગી ગઈ હતી પરંતુ જ્યારે અમે સીસીટીવી ફૂટેજ તપાસ્યા તો તે જૂઠું નીકળ્યું.”
ડીસીપીએ કહ્યું કે આ કેસમાં બંને આરોપીઓ ગૌરવ સોની અને તેના પિતા રાજેન્દ્ર સોની ફરાર છે. ગૌરવની પત્ની અને બાળકો પણ ફરાર છે. ગૌરવ સોની માટે લુકઆઉટ નોટિસ જારી કરવામાં આવી છે.પરંતુ નકલી હોલમાર્ક સર્ટિફિકેટ આપનાર નંદકિશોરની ધરપકડ કરી છે. મુખ્ય આરોપી ગૌરવ સોની સામે લુકઆઉટ નોટિસ પણ જારી કરવામાં આવી છે. આ અમેરિકન મહિલાની ફરિયાદ બાદ પોલીસને બીજી ઘણી ફરિયાદો પણ મળી હતી, જેમાં ગૌરવ સોની અને રાજેન્દ્ર સોની પર કરોડો રૂપિયાની છેતરપિંડીનો આરોપ છે, જેની તપાસ ચાલી રહી છે.
