PM મોદી G7 સમિટમાં ભાગ લેવા ઇટાલી પહોંચ્યા છે. ભારતીય દૂતાવાસના અધિકારીઓ પણ તેમનું સ્વાગત કરવા બ્રિન્ડિસી એરપોર્ટ પર પહોંચ્યા છે. ઇટાલીના બ્રિન્ડિસી એરપોર્ટ પર પહોંચતાની સાથે જ મોદીએ ટ્વિટ કરીને કહ્યું કે હું G7 સમિટમાં ભાગ લેવા ઇટલી પહોચ્યો છે. અર્થપૂર્ણ ચર્ચાઓ માટે વિશ્વના નેતાઓ સાથે મુલાકાત માટે આતુર છીએ. G7 માં અમેરિકા, બ્રિટન, ફ્રાન્સ, ઇટાલી, જર્મની, કેનેડા અને જાપાનનો સમાવેશ થાય છે. ઇટલી હાલમાં G7 સમિટની અધ્યક્ષતા અને હોસ્ટિંગ કરી રહ્યું છે.
G7 સમિટમાં, મોદી ઇટાલિયન વડા પ્રધાન જ્યોર્જિયા મેલોની, યુએસ પ્રમુખ જો બિડેન અને યુક્રેનના રાષ્ટ્રપતિ ઝેલેન્સકી સહિત વિશ્વના ઘણા નેતાઓને મળશે. ત્રીજી વખત ભારતના PM બન્યા બાદ PM મોદીનો આ પ્રથમ વિદેશ પ્રવાસ છે. PM મોદીએ પોતાના એક્સ હેન્ડલ પર લખ્યું કે, અમારો ઉદ્દેશ્ય વૈશ્વિક પડકારોનો ઉકેલ લાવવાનો અને ઉજ્જવળ ભવિષ્ય માટે આંતરરાષ્ટ્રીય સહયોગને પ્રોત્સાહન આપવાનો છે.
ઇટાલીના અપુલિયા પ્રદેશમાં બોર્ગો એગ્નાઝિયાના વૈભવી રિસોર્ટમાં 13 થી 15 જૂન દરમિયાન યોજાનારી G7 સમિટમાં યુક્રેનમાં યુદ્ધ અને ગાઝામાં સંઘર્ષનો દબદબો હોવાની અપેક્ષા છે. સમિટ માટે રવાના થતા પહેલા PM મોદીએ કહ્યું હતું કે તેઓ ખુશ છે કે તેઓ તેમના પ્રથમ વિદેશ પ્રવાસ પર ઈટાલી જઈ રહ્યા છે. “આઉટરીચ સત્રમાં ચર્ચા દરમિયાન, આર્ટિફિશિયલ ઇન્ટેલિજન્સ, ઉર્જા, આફ્રિકા અને ભૂમધ્ય પ્રદેશ પર ધ્યાન કેન્દ્રિત કરવામાં આવશે”
ભારત અને ઇટાલી વચ્ચે દ્વિપક્ષીય બેઠક
G7 બેઠકની સાથે સાથે PM મોદી ઈટાલીના વડા પ્રધાન મેલોની સાથે દ્વિપક્ષીય બેઠક પણ કરશે. વડા પ્રધાને જણાવ્યું હતું કે, “PM મેલોનીની ગયા વર્ષે ભારતની બે મુલાકાતોએ અમારા દ્વિપક્ષીય કાર્યસૂચિને વેગ અને ઊંડાણ આપવા માટે મહત્વપૂર્ણ ભૂમિકા ભજવી હતી.”
