લોકસભા ચૂંટણી પૂરી થતાં જ ભાજપે વિધાનસભા ચૂંટણીઓની તૈયારી શરૂ કરી દીધી છે. આગામી સમયમાં 4 રાજ્યોમાં વિધાનસભાની ચૂંટણીઓ આવી રહી છે ત્યારે ભાજપે સાત દિગ્ગજ નેતાઓની પ્રભારી તરીકે નિમણુંક કરી છે. મહારાષ્ટ્ર, હરિયાણા, ઝારખંડ અને જમ્મુ-કાશ્મીરમાં આ વર્ષના અંત સુધીમાં વિધાનસભા ચૂંટણી યોજાવાની છે. આવી સ્થિતિમાં ભાજપે અત્યારથી જ તૈયારીઓના ભાગ રૂપે ચારેય રાજ્યોમાં પ્રભારી અને સહ પ્રભારીની નિમણૂક કરી છે.
ભાજપે મહારાષ્ટ્ર વિધાનસભાની ચૂંટણી માટે ભુપેન્દ્ર યાદવને ચૂંટણી પ્રભારી તેમજ અશ્વિની વૈષ્ણવને સહ-પ્રભારીની જવાબદારી સોંપી છે. હરિયાણામાં ધર્મેન્દ્ર પ્રધાનને પ્રભારી અને બિપ્લવ દેબને સહપ્રભારી તેમજ ઝારખંડમાં શિવરાજ સિંહ ચૌહાણને પ્રભારી બનાવ્યા છે તો અસમ સીએમ હિમંતા બિસ્વા સરમાને સહપ્રભારીની જવાબદારી સોંપી છે. જમ્મુ-કાશ્મીરની જવાબદારી કિશન રેડ્ડીને સોંપવામાં આવી છે.
મહારાષ્ટ્રમાં વિધાનસભાનો કાર્યકાળ આ વર્ષના અંતે સમાપ્ત થવાનો છે. આવી સ્થિતિમાં રાજ્યની 288 બેઠકો પર ઓક્ટોબર અથવા તે પહેલા ચૂંટણી યોજાઈ શકે છે. તો ઝારખંડમાં પાંચમી જાન્યુઆરી-2025ના રોજ વિધાનસભાનો કાર્યકાળ સમાપ્ત થઈ રહ્યો છે. 81 બેઠકો ધરાવતા રાજ્યમાં ગત વખતે નવેમ્બર-ડિસેમ્બરમાં વિધાનસભા ચૂંટણી યોજાઈ હતી. આવી સ્થિતિમાં નવેમ્બર-ડિસેમ્બર અથવા તે પહેલા ચૂંટણી યોજાવાની સંભાવના છે.
હરિયાણામાં ત્રણ નવેમ્બર-2024ના રોજ વિધાનસભાનો કાર્યકાળ પૂર્ણ થઈ રહ્યો છે. ગત વખતે અહીં ઓક્ટોબર-2019માં ચૂંટણી યોજાઈ હતી, તેથી આ વખતે પણ ઓક્ટોબર અથવા તે પહેલા ચૂંટણી થવાની સંભાવના છે. જમ્મુ-કાશ્મીરમાં સુપ્રીમ કોર્ટે સપ્ટેમ્બર-2024 સુધીમાં ચૂંટણી યોજવાનો આદેશ આપ્યો છે. આવી સ્થિતિમાં સપ્ટેમ્બર અથવા તે પહેલા વિધાનસભા ચૂંટણીઓ યોજાઈ શકે છે.
