ભારતના રાષ્ટ્રીય સુરક્ષા સલાહકાર (NSA) અજીત ડોભાલ રશિયાની મુલાકાતે પહોંચ્યા છે. આ સમયગાળા દરમિયાન રશિયા અને ભારત વચ્ચે ખાસ મિત્રતા જોવા મળી છે. અજીત ડોભાલે રશિયાના રાષ્ટ્રપતિ પુતિન સાથે મુલાકાત કરી હતી. રશિયાના રાષ્ટ્રપતિ પુતિન અને અજીત ડોભાલની વન-ઓન-વન મીટિંગ થઈ હતી, જેમાં બંને એક ટેબલ પર સાથે જોવા મળ્યા હતા.
NSA અજીત ડોભાલે પીએમ મોદીની તાજેતરની યુક્રેન મુલાકાત અંગે પુતિનને સંદેશ પણ આપ્યો હતો. આ દર્શાવે છે કે ભારત પીએમ મોદીની મુલાકાતનો રશિયાના પક્ષમાંથી અન્ય કોઈ અર્થ કાઢવા માંગતું નથી. મીટિંગ દરમિયાન, રશિયન રાષ્ટ્રપતિ પુતિને કહ્યું કે તેઓ આ વર્ષના અંતમાં કઝાન (રશિયા) માં બ્રિક્સ સમિટમાં ભાગ લેવા માટે પીએમ મોદીની રાહ જોઈ રહ્યા છે.
તેમણે બેઠકમાં ભારતીય પીએમ સાથે દ્વિપક્ષીય સમિટ યોજવાનો પણ પ્રસ્તાવ મૂક્યો હતો. રશિયાના સરકારી મીડિયાના અહેવાલોમાં જણાવ્યું છે કે રાષ્ટ્રપતિ પુતિને ડોભાલ સાથેની મુલાકાત દરમિયાન પીએમ મોદી સાથે વાત કરવાની ઈચ્છા વ્યક્ત કરી હતી.
ભારતના રાષ્ટ્રીય સુરક્ષા સલાહકાર NSA અજીત ડોભાલે ગુરુવારે સેન્ટ પીટર્સબર્ગમાં રશિયાના રાષ્ટ્રપતિ પુતિન સાથે મુલાકાત કરી હતી. વિદેશ મંત્રાલયે સાપ્તાહિક પ્રેસ બ્રીફિંગ દરમિયાન જણાવ્યું હતું. ડોભાલ ઉચ્ચ સ્તરીય સુરક્ષા અધિકારીઓની બેઠકમાં ભાગ લેવા સેન્ટ પીટર્સબર્ગ પહોંચ્યા હતા.
અજીત ડોભાલની રશિયાની મુલાકાત એ સમયે થઈ છે, જ્યારે યુક્રેનમાં યુદ્ધ સતત વધી રહ્યું છે. મુલાકાત દરમિયાન યુક્રેનમાં યુદ્ધ અને શાંતિના પ્રયાસો પર ચર્ચા થવાની અપેક્ષા છે. રશિયાના રાષ્ટ્રપતિ પુતિને આ મહિનાની શરૂઆતમાં કહ્યું હતું કે ચીન, ભારત અને બ્રાઝિલ યુક્રેન પર સંભવિત શાંતિ વાટાઘાટોમાં મધ્યસ્થી તરીકે કામ કરી શકે છે. વિદેશ મંત્રાલયે કહ્યું કે રશિયાએ તાજેતરમાં સંઘર્ષમાં ફસાયેલા 6 ભારતીયોને મુક્ત કર્યા છે. રશિયામાંથી મુક્ત થયેલા ભારતીયોની કુલ સંખ્યા 45 પર પહોંચી ગઈ છે.
