બોપલમાં રહેતી એક યુવતી પૂણેના સાહિલ અહેમદના ‘વશ’માં આવી ગઈ હોવાથી પરિવારના સભ્યો પરેશાન થઈ ગયા છે. પૂણે બેઠા બેઠા સાહિલ અહેમદ નામનો યુવક વિડીયો કોલ કરી યુવતીને સિગારેટ પીવાનું કહે તો તે સિગારેટ પીવા લાગે છે. તેમજ જો પોતાની જાતને જ ડામ દેવાનું કહે અને કપડાં ઉતારવાનું કહે તો યુવતી એ પણ કરવા લાગે છે. સાહિલ અહેમદે આ યુવતીના ફોટો અને વિડીયો પોતાની પાસે રાખી બ્લેક મેઇલ કરવાનું શરૂ કર્યું હતું.પૂણેથી યુવક QR કોડ મોકલી પૈસા મંગાવી રહ્યો છે. આ ત્રાસથી કંટાળીને યુવતીના પરિવારે બોપલ પોલીસ સ્ટેશનમાં ફરિયાદ નોધાવી છે. જેને પગલે પોલીસે તપાસ શરૂ કરી છે.
સાહિલ તેમની દીકરીને કોલ કરી સતત પરેશાન કરતો હતો. તેણે વીડિયો કોલ કરી યુવતીને કપડાં ઉતરાવ્યા અને પછી તેનો વીડિયો ઉતારી લીધો છે. હવે આ વીડિયો વાઇરલ કરવાનો ડર બતાવી તે યુવતીને બ્લેકમેઇલ કરી રહ્યો છે. સાહિલ યુવતીને QR કોડ મોકલી વારંવાર પૈસા પડાવે છે. યુવતીને વીડિયો કોલ કરી હાથ પર બ્લેડ મારવાનું કહે છે. સિગારેટ પીવાનું કહે છે અને તેના મિત્રો સાથે વાત કરવા મજબૂર કરે છે.
યુવતી પાસે રૂપિયા ના હોય ત્યારે તે પોતાના સ્વજનોને સાહિલે મોકલેલો QR કોડ મોકલી તેમાં રૂપિયા ટ્રન્સફર કરવા આજીજી કરતી હોય છે. આ બાબત પણ તેના માતા પિતાના ધ્યાને આવી છે. પરંતુ હદ તો ત્યારે થઇ ગઇ કે સાહિલે યુવતીના વોટ્સએપ, સ્નેપચેટ તથા ઇન્સ્ટાગ્રામના યુઝરનેમ પાસવર્ડ મેળવી લીધા છે. જેના આધારે પરિવાર તેમની દીકરીની તમામ સોશિયલ મીડિયા એક્ટિવિટી પર નજર રાખી રહ્યો છે. સાહિલના ત્રાસથી માનસિક રીતે ભાંગી પડેલી યુવતીને તેના પરિવારે યોગા સેન્ટરમાં મોકલી આપી છે ત્યાં પણ સાહિલે યુવતીને કોલ કરી હાથ પર બ્લેડ મરાવી હતી. આ ઘટનાને લઇને યુવતીનો પરિવાર ભાંગી પડ્યો હતો અને પોતાની દીકરીને સાહિલના ત્રાસમાંથી મુક્ત કરાવવા માટે પોલીસ ફરિયાદ કરી છે. જેના આધારે પોલીસે તપાસ શરૂ કરી છે. આ પ્રકરણની તપાસ કરી રહેલા પોલીસ ઇન્સ્પેકટર ગોહિલે જણાવ્યું હતું કે ફરિયાદને આધારે તપાસ શરૂ કરવામાં આવી છે. સાહિલ સામે ચોક્કસ કડક પગલાં લેવામાં આવશે.
