પુણેમાં હેલિકોપ્ટર ક્રેશ: બે પાઇલટ અને એન્જિનિયર સહિત 3 લોકોના મોત

મહારાષ્ટ્રના પુણેમાં બુધવારે એક હેલિકોપ્ટર ક્રેશ થયું છે. તેમાં મુસાફરી કરી રહેલા ત્રણ લોકોના મોત થયા હતા. મૃતકોમાં બે પાઇલટ અને એક એન્જિનિયરનો સમાવેશ થાય છે. આ ઘટના સવારે 6:30 થી 7 વચ્ચે બાવધન વિસ્તારમાં કેકે કન્સ્ટ્રક્શન હિલ પાસે બની હતી.
પોલીસના જણાવ્યા અનુસાર, હેલિકોપ્ટર ઓક્સફોર્ડ ગોલ્ફ કોર્સ પાસેના હેલિપેડ પરથી ઉડાન ભરી હતી. ટેકઓફના લગભગ 10 મિનિટ બાદ હેલિકોપ્ટર 1.5 કિમીના અંતરે ક્રેશ થયું હતું. આ અકસ્માત પહાડી વિસ્તારમાં બન્યો હતો. સવારે ત્યાં ગાઢ ધુમ્મસ હતું. દુર્ઘટના બાદ હેલિકોપ્ટરમાં આગ લાગી હતી. જેના કારણે ત્રણેય લોકો ગંભીર રીતે દાઝી ગયા હતા. પિંપરી ચિંચવડ પોલીસ, ફાયર બ્રિગેડ અને મેડિકલ ટીમ ઘટનાસ્થળે પહોંચી ગઈ છે.