આજથી 9 દિવસ માટે દુનિયાના સૌથી લાંબા નૃત્ય મહોત્સવ નવરાત્રિનો પ્રારંભ થઈ રહ્યો છે. અબાલ વૃદ્ધ સૌ કોઈ આધ્યશક્તિની આરાધના સાથે ગરબે ઘૂમશે. ત્યારે મોટી સંખ્યામાં પાર્ટીપ્લોટ, ગ્રાઉન્ડ સહિત રાજ્યના શહેરો અને ગામડાંમાં ગરબાના આયોજન કરાયા છે ત્યારે ગુજરાત પોલીસ પણ આ આયોજનોનો સફળ બનાવવા માટે ખડેપગે રહેશે. જેના માટે નવરાત્રિ આયોજન કરાયા છે તેવા સ્થળોનું ડ્રોન સર્વેલન્સ કરશે,
ગરબાના ગ્રાઉન્ડ પર SHE ટીમ રોમિયોને પકડવા ગરબે ઘૂમશે. તો પોલીસની પેટ્રોલિંગ ટીમ રાઉન્ડમાં રહેશે. આ ઉપરાંત ઘોડે સવાર પોલીસ પણ જોડાશે. હાલના ટેક્નિકલ અને ડિજિટલ યુગમાં AI અને બોડીવોર્ન કેમેરાથી ગુનેગારો-રોમિયો પર નજર રાખશે. આ ઉપરાતં ગુનેગારો પણ આ જગ્યાએ પોતાનો મનસૂબો પૂરો કરવા માટે પહોંચી જાય છે. જેમાં વોન્ટેડ અથવા માથાભારે શખસોનો પણ સમાવેશ થતો હોય છે.
સુરત શહેરમાં આ વખતે 17 મોટા આયોજનો ઉપરાંત 2700 જગ્યાએ ભવ્ય નવરાત્રિ આયોજનછે, જેમાં શેરી ગરબા પણ સામેલ છે, ત્યારે કોઈ પણ અપ્રિય ઘટના ન બને આ માટે સુરત પોલીસ પણ હાઈ એલર્ટ પર છે. સીસીટીવી અને આર્ટિફિશિયલ ઇન્ટેલિજન્સ (AI)ની મદદથી તમામ મોટા આયોજનો ઉપર સુરત પોલીસ નજર રાખશે. 37 સિટીમાં લગભગ 150થી પણ વધુ પોલીસકર્મીઓ પરંપરાગત વેશભૂષામાં ખેલૈયાઓ સાથે ગરબા રમશે. લગભગ 3000 પોલીસ અલગ-અલગ આયોજનો પર તેના જ રહેશે. બાર વાગ્યા પછી સુરતમાં ટ્રાફિક સિગ્નલ બંધ કરી દેવામાં આવશે. ખાસ મહિલાઓ માટે હેલ્પલાઇન નંબર જાહેર કરવામાં આવ્યા છે. જો મહિલાઓને અચાનક જરૂર પડે તો તેઓ હેલ્પલાઇન નંબર પર કોલ કરશે, તો પોલીસ તાત્કાલિક ઘટનાસ્થળે પહોંચી જશે. એટલું જ નહીં, અશ્વ સવારી કરીને પણ પોલીસ પેટ્રોલિંગ કરશે.
