ડિઝની સ્ટાર ઈન્ડિયા અને રિલાયન્સનું વાયાકોમ-18 હવે એક થઈ ગયું છે. આમાં ડિઝની હોટસ્ટાર અને જિયો સિનેમા પણ સામેલ છે. આ બંને કંપનીઓએ ગુરુવારે 14 નવેમ્બરે આની જાહેરાત કરી હતી. આ મર્જર પછી તે દેશનું સૌથી મોટું એન્ટરટેઈનમેન્ટ નેટવર્ક બની ગયું છે.
ડિઝની-રિલાયન્સ એન્ટરટેઈનમેન્ટ પાસે હવે 75 કરોડ દર્શકો છે જેમાં 2 ઓવર ધ ટોપ એટલે કે OTT અને 120 ચેનલો છે. રિલાયન્સે આ સંયુક્ત સાહસ માટે રૂ. 11,500 કરોડનું રોકાણ કર્યું છે. મર્જરની પ્રક્રિયા છેલ્લા એક વર્ષથી ચાલી રહી હતી.
બંને કંપનીઓએ કહ્યું- ‘આ ડીલ 70,352 કરોડ રૂપિયામાં થઈ છે. મર્જર પછી રચાયેલી કંપનીમાં રિલાયન્સ 63.16% અને ડિઝની પાસે 36.84% હિસ્સો રહેશે. આ નવી કંપનીના ચેરપર્સન નીતા અંબાણી હશે. ઉપાધ્યક્ષ ઉદય શંકર રહેશે. આ કંપનીને વ્યૂહાત્મક માર્ગદર્શન આપશે.
ત્રણ સીઈઓ આ સંયુક્ત સાહસનું નેતૃત્વ કરશે. કેવિન વાઝ એન્ટરટેઇનમેન્ટના વડા રહેશે. કિરણ મણિ ડિજિટલ સંસ્થાનો હવાલો સંભાળશે. સંજોગ ગુપ્તા સ્પોર્ટ્સ ઓર્ગેનાઈઝેશનનું નેતૃત્વ કરશે. રિલાયન્સ ઇન્ડસ્ટ્રીઝના ચેરમેન મુકેશ અંબાણીએ કહ્યું, ‘આ સંયુક્ત સાહસ સાથે, ભારતીય મીડિયા અને મનોરંજન ઉદ્યોગ પરિવર્તનશીલ યુગમાં પ્રવેશી રહ્યું છે. હું સંયુક્ત સાહસના ભાવિ વિશે ખૂબ જ ઉત્સાહિત છું અને તેની સફળતાની ઇચ્છા કરું છું.
