હૈદરાબાદમાં ઓસ્માનિયા યુનિવર્સિટીના વિદ્યાર્થીઓએ અભિનેતા અલ્લુ અર્જુનના ઘરની બહાર તોડફોડ કરી છે. પોલીસે આ કેસમાં 8 સભ્યોની ધરપકડ કરી છે. આ લોકો એક્ટરના ઘરમાં બળજબરીથી ઘૂસવાનો પ્રયાસ કરી રહ્યા હતા. તેમણે પુષ્પા-2ના પ્રીમિયર દરમિયાન સંધ્યા થિયેટરમાં થયેલી નાસભાગમાં મૃત્યુ પામેલી મહિલાના પરિવારને 1 કરોડ રૂપિયાના વળતરની માગણી કરી હતી.
આ ઘટનાના થોડા સમય પહેલા, અલ્લુ અર્જુને પોસ્ટ કર્યું હતું – હું મારા બધા ચાહકોને અપીલ કરું છું કે તેઓ હંમેશાની જેમ જવાબદારીપૂર્વક તેમની લાગણીઓ વ્યક્ત કરે. કોઈપણ પ્રકારની અપમાનજનક ભાષાનો ઉપયોગ કરશો નહીં, ઓનલાઈન અથવા ઓફલાઈન, કે કોઈની સાથે ગેરવર્તન ન કરો.
તેલંગાણાના મુખ્યમંત્રી રેવન્ત રેડ્ડીએ શનિવારે વિધાનસભામાં કહ્યું હતું – અલ્લુ અર્જુન બેદરકાર હતો અને મોતની માહિતી મળવા છતાં થિયેટરમાંથી બહાર ન આવ્યો અને રોડ શો કર્યો. અકસ્માતમાં જીવ ગુમાવનાર મહિલા રેવતીએ તેના પુત્ર શ્રેતેજનો હાથ એટલો સજ્જડ પકડ્યો હતો કે પોલીસ તેમને અલગ કરી શકી ન હતી. પીડિત પરિવાર દર મહિને 30 હજાર રૂપિયા કમાય છે, પરંતુ દરેક ટિકિટ પર 3000 રૂપિયા ખર્ચે છે, કારણ કે પુત્ર અલ્લુ અર્જુનનો ફેન છે.
અલ્લુ અર્જુને શનિવારે પ્રેસ કોન્ફરન્સમાં કહ્યું – પુષ્પા 2ના પ્રીમિયરમાં હૈદરાબાદમાં થયેલી નાસભાગ માટે મને જવાબદાર ગણવામાં આવી રહ્યો છે. કેટલાક લોકો જાણીજોઈને મારું ચારિત્ર્ય હનન કરી રહ્યા છે. હું ઇન્ડસ્ટ્રીમાં 20 વર્ષથી છું. મેં જે સન્માન અને વિશ્વસનીયતા કમાવી છે તે એક જ દિવસમાં નાશ પામી છે. આ કારણે હું અપમાન અનુભવી રહ્યો છું.
