ભારતીય સેનાએ બુધવારે મહારાષ્ટ્રના પુણેમાં 77માં આર્મી ડેની ઉજવણી કરી. પુણેમાં આર્મી ડે પરેડ બોમ્બે એન્જીનીયર્સ ગ્રુપ અને સેન્ટર પરેડ ગ્રાઉન્ડ ખાતે યોજાઈ હતી. આ સાથે, આ સતત ત્રીજું વર્ષ છે જ્યારે દિલ્હીની બહાર આર્મી ડે પરેડનું આયોજન કરવામાં આવ્યું છે. 2023માં, આર્મી ડે બેંગલુરુમાં ઉજવવામાં આવ્યો હતો, જ્યારે ગયા વર્ષે તે ઉત્તર પ્રદેશની રાજધાની લખનૌમાં મનાવવામાં આવ્યો હતો.
આર્મી ડે સેલિબ્રેશનમાં 52 એવોર્ડ પણ આપવામાં આવ્યા હતા. આમાં 15 સેના મેડલ (વીરતા) સામેલ છે, જેમાંથી 8 મરણોત્તર એનાયત કરવામાં આવ્યા હતા. આ ઉપરાંત, વિવિધ કમાન્ડના એકમોના શ્રેષ્ઠ પ્રયાસો માટે 37 ચીફ ઓફ આર્મી સ્ટાફ (COAS) યુનિટ પ્રશંસા પુરસ્કાર આપવામાં આવ્યા હતા.
આ પરેડની શરૂઆત પહેલા આર્મી સ્ટાફ જનરલ ઉપેન્દ્ર દ્વિવેદીએ કમાન્ડ વોર મેમોરિયલ પર પુષ્પાંજલી અર્પણ કરી હતી. તેમણે દેશ માટે બલિદાન આપનાર બહાદુર સૈનિકોને શ્રદ્ધાંજલિ આપી હતી. જનરલ ઉપેન્દ્ર દ્વિવેદીએ સમીક્ષા અધિકારી તરીકે પરેડ દરમિયાન સલામી આપી હતી. આ પરેડનું નેતૃત્વ મેજર જનરલ અનુરાગ વિજે કર્યું હતું, જેઓ દક્ષિણ મહારાષ્ટ્ર અને ગોવા સબ એરિયાના જનરલ ઓફિસર કમાન્ડિંગ છે.
પીએમ મોદીએ કહ્યું કે આર્મી ડેના અવસરે અમે ભારતીય સેનાના અતૂટ સાહસને સલામ કરીએ છીએ. આ હિંમત આપણા દેશની સુરક્ષાની રક્ષક છે. અમે એવા સૈનિકોને પણ યાદ કરીએ છીએ જેમણે લાખો ભારતીયોની સુરક્ષા સુનિશ્ચિત કરવા માટે પોતાના જીવનનું બલિદાન આપ્યું હતું.
રાષ્ટ્રપતિ દ્રૌપદી મુર્મૂએ આર્મી ડે નિમિત્તે X પોસ્ટમાં કહ્યું- આર્મી ડેના અવસરે હું ભારતીય સેનાના સૈનિકો, ભૂતપૂર્વ સૈનિકો અને તેમના પરિવારોને શુભેચ્છા પાઠવું છું. રાષ્ટ્રની સાર્વભૌમત્વની રક્ષા અને સુરક્ષા સુનિશ્ચિત કરવા માટે તમારી અતૂટ પ્રતિબદ્ધતા આપણા બધા માટે પ્રેરણારૂપ છે. માતૃભૂમિની સેવામાં આપેલા અસંખ્ય બલિદાનોને આ દેશ કૃતજ્ઞતા સાથે યાદ કરે છે. સંકટ અને આફત દરમિયાન તમે દયા અને સહાનુભૂતિ દર્શાવીને મદદ કરો છો. તમારી આ બહાદુરી અને હિંમત આવનારી પેઢીઓને હંમેશા પ્રેરણા આપશે.
