સુરત : ડ્રગ્સના સેવનથી મૃત્યુની પહેલી ઘટના : નશો ઓવરડોઝ કરવા ડ્રગ્સ ઇન્જેક્શનથી લીધું

ડ્રગ્સનું ઈન્જેક્શન લીધા બાદ ખેંચ આવીને અચાનક તબિયત લથડતા ઉનના યુવકનું મોત નીપજ્યું છે. ડ્રગ્સના સેવનથી મૃત્યુની આ શહેરની પહેલી ઘટના છે. ઉન સંજરનગર બિસ્મીલ્લાહ સિદ્દીકી પેલેસ ખાતે રહેતા 32 વર્ષીય નવાઝખાન મોહંમદખાન પઠાણે ડાબા હાથમાં ઇન્જેક્શનથી ડ્રગ્સ લીધું હતું. ડ્રગ્સ લીધા બાદ તેને બ્રેઇન ઇન્જરી થઈ હતી પછી 7 દિવસમાં મગજ, હૃદય, ફેફસાં, કિડની, લિવર ફેઇલ થઈ ગયા હતા. છેલ્લે 109 ફેરનહીટ તાવ આવ્યો ને મોત થયું હતું. ડ્રગ્સ લીધા બાદ કેવી રીતે સારવાર અપાઈ પણ બચાવી ન શકાયો
નવાઝનું મોત નીપજ્યા બાદ તેના ભાઈ ઈમરાનખાન પઠાણે આક્ષેપ કર્યો છે કે નવાઝખાન પહેલા દારૂ પીતો હતો પરંતુ છેલ્લા પંદરેક દિવસથી એમડી ડ્રગ્સના રવાડે ચડી ગયો હતો. 20 તારીખે એમડી ડ્રગ્સનું ઈન્જેક્શન લીધા બાદ તેની તબિયત ખરાબ થઈ હતી અને તેના કારણેે જ તેનું મોત નીપજ્યું છે. એવી ખબર પડી છે કે ઉન પાટીયાથી ચંડાલ ચોકડી સુધી આ ધંધો થાય છે. માફીયાઓ સામે પોલીસ કાર્યવાહી કરે અને ન્યાય અપાવે એવી અમારી માંગણી છે.
મૃતક નવાઝખાનનું પોસ્ટમોર્ટમ કરનાર નવી સિવિલના તબીબે જણાવ્યું હતું કે મૃતકનું મોત ડ્રગ્સના કારણે થયું છે કે નહીં તે જાણવા માટે મૃતકના ડાબા હાથમાં ઈન્જેક્શનના માર્ક પાસેની ચામડી, બ્લડ, યુરીન, હીસ્ટોપેથો અને કેમિકલના સેમ્પલ લીધા છે. આ સેમ્પલોનો રિપોર્ટ આવ્યા બાદ મોતનું ચોક્કસ કારણ સ્પષ્ટ થશે.