વોશિંગ્ટન ડીસીમાં અમેરિકાના રાષ્ટ્રપતિ ડોનાલ્ડ ટ્રમ્પ અને ભારતના વડા પ્રધાન નરેન્દ્ર મોદી વચ્ચે મુલાકાત થઈ. અમેરિકામાં સત્તા સંભાળ્યા પછી ટ્રમ્પની મોદી સાથે આ પહેલી મુલાકાત હતી. અમેરિકન રાષ્ટ્રપતિના સત્તાવાર નિવાસસ્થાન વ્હાઇટ હાઉસમાં બંને વૈશ્વિક નેતાઓએ દ્વિપક્ષીય બેઠકો યોજી હતી. વ્હાઇટ હાઉસ ખાતે દ્વિપક્ષીય વાટાઘાટો પછી વડા પ્રધાન નરેન્દ્ર મોદી અને અમેરિકાના રાષ્ટ્રપતિ ડોનાલ્ડ ટ્રમ્પે સંયુક્ત પત્રકાર પરિષદ યોજી હતી, જ્યાં તેમણે બંને દેશો વચ્ચે થયેલા મહત્વપૂર્ણ કરારો વિશે માહિતી આપી હતી. પીએમએ કહ્યું કે 2030 સુધીમાં આપણે ભારત-અમેરિકા વેપાર બમણો કરીશું. ટ્રમ્પે પીએમ મોદીને પોતાના કરતા વધુ સારા નેગોશિએટર ગણાવ્યા છે.
સંયુક્ત પત્રકાર પરિષદની શરૂઆત રાષ્ટ્રપતિ ડોનાલ્ડ ટ્રમ્પે તેમની ભારત મુલાકાત અને પીએમ મોદીના આતિથ્યને યાદ કરીને કરી. તેમણે દેશોને આર્થિક રીતે મજબૂત બનાવવા માટે એક માળખાની જાહેરાત કરી. ટ્રમ્પે કહ્યું કે આ વર્ષે અબજો ડોલરના વધુ સંરક્ષણ વેચાણ શરૂ થઈ રહ્યા છે. ક્વાડ અને ઈન્ડો-પેસિફિક મજબૂત બનશે. ટ્રમ્પે કહ્યું કે તહવ્વુર રાણાને ભારત પ્રત્યાર્પણ કરવામાં આવશે. અમેરિકી રાષ્ટ્રપતિ ડોનાલ્ડ ટ્રમ્પે કહ્યું, “મને લાગે છે કે ચીન સાથે આપણા ખૂબ સારા સંબંધો રહેશે. કોવિડ-૧૯ મહામારી પહેલા રાષ્ટ્રપતિ શી સાથે મારા ખૂબ સારા સંબંધો હતા. મને લાગે છે કે ચીન દુનિયાનો ખૂબ જ મહત્વપૂર્ણ ખેલાડી છે. મને લાગે છે કે તેઓ યુક્રેન અને રશિયા સાથેના આ યુદ્ધને સમાપ્ત કરવામાં આપણને મદદ કરી શકે છે. મને આશા છે કે ચીન, ભારત, રશિયા અને અમેરિકા, આપણે બધા સાથે મળીને કામ કરી શકીશું. આ ખૂબ જ મહત્વપૂર્ણ છે.”
સંયુક્ત પત્રકાર પરિષદમાં પીએમ મોદીએ કહ્યું, સૌ પ્રથમ, હું મારા પ્રિય મિત્ર રાષ્ટ્રપતિ ટ્રમ્પનો તેમના અદ્ભુત સ્વાગત અને આતિથ્ય માટે હૃદયપૂર્વક આભાર વ્યક્ત કરું છું. રાષ્ટ્રપતિ ટ્રમ્પે તેમના નેતૃત્વ દ્વારા ભારત-અમેરિકા સંબંધોને પોષ્યા અને જીવંત કર્યા છે. અમે આતંકવાદ સામે લડવામાં સહયોગ કરીશું. સરહદ પારના આતંકવાદ સામે કડક કાર્યવાહીની જરૂર છે. ૨૬/૧૧ના આતંકવાદી તહવ્વુર રાણાના પ્રત્યાર્પણનો નિર્ણય લેવા બદલ હું રાષ્ટ્રપતિ ટ્રમ્પનો આભારી છું. આપણી અદાલતો તેને ન્યાય અપાવશે. પીએમ મોદીએ કહ્યું, ‘અમારું માનવું છે કે ભારત અને અમેરિકાની એકતા અને સહયોગ એક સારી દુનિયાને આકાર આપી શકે છે.’
મોદીએ કહ્યું, ‘ભારતની સંરક્ષણ તૈયારીઓમાં અમેરિકાની મહત્વપૂર્ણ ભૂમિકા છે.’ વ્યૂહાત્મક અને વિશ્વસનીય ભાગીદારો તરીકે, અમે સંયુક્ત વિકાસ, સંયુક્ત ઉત્પાદન અને ટેકનોલોજીના ટ્રાન્સફરને સક્રિયપણે અનુસરી રહ્યા છીએ. આજે આપણે TRUST પર સંમત થયા છીએ, એટલે કે વ્યૂહાત્મક ટેકનોલોજીનો ઉપયોગ કરીને સંબંધોમાં પરિવર્તન. આ અંતર્ગત, મહત્વપૂર્ણ ખનિજો, અદ્યતન સામગ્રી અને ફાર્માસ્યુટિકલ્સની મજબૂત સપ્લાય ચેઇન બનાવવા પર ભાર મૂકવામાં આવશે.
પીએમએ કહ્યું, ‘ભારત અને અમેરિકા વચ્ચેની ભાગીદારી લોકશાહી અને લોકશાહી મૂલ્યો અને પ્રણાલીઓને મજબૂત બનાવે છે.’ આપણે ઈન્ડો-પેસિફિકમાં શાંતિ, સ્થિરતા અને સમૃદ્ધિ વધારવા માટે સાથે મળીને કામ કરીશું. આમાં ક્વાડની ખાસ ભૂમિકા રહેશે. આતંકવાદ સામેની લડાઈમાં ભારત અને અમેરિકા મજબૂતીથી સાથે ઉભા રહ્યા છે. અમે સંમત છીએ કે સરહદ પારના આતંકવાદને નાબૂદ કરવા માટે નક્કર કાર્યવાહી જરૂરી છે.
PM મોદીએ USના રાષ્ટ્રપતિને ભારત આવવાનું આપ્યું આમંત્રણ
સંયુક્ત પત્રકાર પરિષદને સંબોધતા પીએમ મોદીએ કહ્યું કે અમે 2030 સુધીમાં દ્વિપક્ષીય વેપારને બમણો કરીને $500 બિલિયન કરવાનો લક્ષ્યાંક રાખ્યો છે. અમારી ટીમો ટૂંક સમયમાં વેપાર સોદા પર કામ કરશે. આગામી દાયકા માટે સંરક્ષણ સહયોગ માળખું બનાવવામાં આવશે. તે ઈન્ડો-પેસિફિક ક્ષેત્રમાં શાંતિ અને સમૃદ્ધિમાં મહત્વપૂર્ણ ભૂમિકા ભજવશે. અમે આતંકવાદ સામે સાથે ઉભા છીએ. પીએમ મોદીએ ટ્રમ્પને ભારત આવવાનું આમંત્રણ આપ્યું.
