યુવતીને અન્ય જ્ઞાતિના યુવક સાથે પ્રેમ થઈ જતાં સગા બાપે મોતને ઘાટ ઉતારી

ફિલ્મી સ્ટોરીને ટક્કર મારે તેવી ઘટના પાલીતાણાના રાણપરડા ગામે ઘટી છે, યુવતીને અન્ય જ્ઞાતિના યુવક સાથે પ્રેમ થઈ જતાં પરિવારના વડીલોએ તેનો સ્વીકાર નહિ કરી અને યુવતીને સુરતથી વતનના ગામમાં લાવી મોતને ઘાટ ઉતારી દઈ અને મૃતદેહના અગ્નિ સંસ્કાર પણ કરી નાખ્યાં હતાં. આ સમગ્ર ઘટનાક્રમ યુવતીની નાની બહેનની નજર સામે જ બન્યો હતો. ઘટનાને અંજામ આપ્યા બાદ જાણે કશું બન્યું જ નથી તેમ યુવતીના પિતા પરત સુરત જતાં થયા હતા જ્યારે તેનો કાકા ફરાર થઈ ગયો હતો. બનાવ અંગે યુવતીના નાના એ પોલીસને જાણ કરતા સમગ્ર ઘટના પ્રકાશમાં આવી છે એન્ડ હવે આરોપીઓને ઝડપી લેવા તજવીજ હાથ ધરાઇ છે.
ચકચારી ઘટનાની મળતી વિગતો પ્રમાણે પાલિતાણા તાલુકાના રાણપરડા ગામના જલ્પાબેન દિપકભાઈ રાઠોડ (ઉ.વ.૧૯) અન્ય જ્ઞાતિના યુવક સાથે પ્રેમસંબંધ હોવાની જાણ યુવતીના પરિવારને થતાં ગત તા.૭મી માર્ચના રોજ સવારે ૭ થી ૮ કલાકના અરસામાં યુવતીના ઘરે તેણી કાકા ભાવસંગ ઉર્ફે લાલજી ધીરૂભાઈ રાઠોડે જાપટ અને મારમારી તથા યુવતીના પિતા દિપક ધીરૂભાઈ રાઠોડે તેમની દિકરીનું ગળું દબાવી મોત નિપજાવ્યું હતું અને બાદમાં યુવતીના મૃતદેહને રાણપરડા ગામના સ્મશાનમાં સળગાવી દીધો હતો. બનાવ અંગે યુવતીના નાના પોપટભાઈ મનજીભાઈ ગોહિલ (રહે.સાંઢખાખરા, તા.ગારિયાધાર)એ પાલિતાણા ગ્રામ્ય પોલીસ મથકમાં દિપક ધીરૂભાઈ રાઠોડ અને ભાવસંગ ઉર્ફે લાલજી ધીરૂભાઈ રાઠોડ વિરૂદ્ધ ફરિયાદ નોંધાવતા પાલિતાણા ગ્રામ્ય પોલીસે હત્યા, પુરાવાના નાશ કરવા, મારમારવા સહિતની કલમ હેઠળ ગુનો નોંધી આગળની તપાસ હાથ ધરી છે.