ભારત અમેરિકા વચ્ચેની ટ્રેડ ડિલ છેલ્લા તબક્કામાં!,

અમેરિકા અને ભારતની ટ્રેડ ડિલ પર દેશભરની નજર ટકી રહી છે. ઘણા સમયથી આ ડિલ મુલતવી રાખવામાં આવી છે. એક નિર્ણય પર સહમત થવા માટે બંને દેશોએ અગાઉ પણ પ્રયાસ કર્યા હતા. બીજી બાજુ ડોનાલ્ડ ટ્રમ્પ એક બાદ એક વિવિધ દેશો પર ટેરિફની જાહેરાત કરી રહ્યા છે. આ વચ્ચે ઈન્ડોનેશિયા સાથે સફળ વેપાર ડીલ બાદ તેમને ભારત સાથે ટ્રેડ ડિલની જલ્દી પૂર્ણ થવાના સંકેત આપ્યા હતા.
ટ્રમ્પે જણાવ્યું કે તેમની ટેરિફ નીતિઓને કારણે અમેરિકા ભારત જેવા બજારોમાં પ્રવેશ મેળવવામાં સફળ થઈ રહ્યું છે. તેમણે દાવો કર્યો કે ભારત સાથેની વેપાર ડીલ ટૂંક સમયમાં અંતિમ સ્વરૂપ લઈ શકે છે, જોકે વ્હાઇટ હાઉસે હજુ આ ડીલની ચોક્કસ વિગતો જાહેર કરી નથી. ટ્રમ્પે ઇન્ડોનેશિયા સાથેની $19.5 બિલિયનની ડીલનું ઉદાહરણ આપતા કહ્યું કે ભારતમાં પણ આવી જ તકો ઊભી થશે.ભારતે રાજેશ અગ્રવાલના નેતૃત્વમાં એક ટ્રેડ ડેલિગેશન અમેરિકા મોકલ્યું છે, જે આ ડીલને અંતિમ સ્વરૂપ આપવા માટે વાટઘાટો કરી રહ્યું છે. જોકે, બંને પક્ષો વચ્ચે હજુ અંતિમ સહમતિ થઈ નથી. ટ્રમ્પે ભારપૂર્વક જણાવ્યું કે તેમની સખત ટેરિફ નીતિઓએ ભારત જેવા દેશોના બજારો ખોલવામાં મદદ કરી છે. આ ડીલ ભારત અને અમેરિકા વચ્ચે આર્થિક સંબંધોને મજબૂત કરી શકે છે.