કેનેડાના કેટલાક ભાગોમાં આ સમયે કાળઝાળ ગરમીનો પ્રકોપ યથાવત છે, અસહ્ય ગરમી અને બફારાએ લોકોની મુશ્કેલીઓ વધારી દીધી છે. ટોરોન્ટો સહિત દક્ષિણ ઓન્ટારિયોના ઘણા શહેરોમાં તાપમાને જૂના રેકોર્ડ તોડી નાખ્યા છે. ટોરોન્ટોના ડાઉનટાઉન વિસ્તારમાં મંગળવારે તાપમાન 37.3 ડિગ્રી સેલ્સિયસ સુધી પહોંચી ગયું હતું, જે જુલાઈના આ સમયગાળાના 31 વર્ષ જૂના રેકોર્ડ કરતાં પણ વધુ રહ્યું.
એન્વાયરમેન્ટ કેનેડાના જણાવ્યા અનુસાર, આ પહેલાં 14 જુલાઈએ ટોરોન્ટો પિયર્સન એરપોર્ટ પર સૌથી વધુ તાપમાન 1995માં નોંધાયું હતું, જ્યારે પારો 36.7 ડિગ્રી સેલ્સિયસ સુધી પહોંચ્યો હતો. આ વખતે તાપમાન તે સ્તરને પણ વટાવી ગયું છે. જો કે, ભારે બફારાને કારણે લોકોને 40 થી 45 ડિગ્રી સેલ્સિયસ જેવી અસહ્ય ગરમીનો અહેસાસ થયો હતો.
કાળઝાળ ગરમીના કારણે ઓન્ટારિયોના મોટાભાગના વિસ્તારોમાં હીટ વોર્નિંગ જારી કરવામાં આવી છે. આ સિવાય મેનિટોબા, સસ્કેચેવાન, અલ્બર્ટા અને નોર્થવેસ્ટ ટેરિટરીઝના ઘણા વિસ્તારોમાં પણ ગરમી અને હવાની નબળી ગુણવત્તાને લઈને એલર્ટ જાહેર કરવામાં આવ્યા છે.
ગરમીની વચ્ચે પશ્ચિમ કેનેડામાં જંગલોની આગનો ધુમાડો પણ લોકો માટે મુશ્કેલીનું કારણ બન્યો છે. થંડર બેની આસપાસના વિસ્તારોમાં જંગલોની આગમાંથી નીકળતો ધુમાડો પવન સાથે પહોંચી રહ્યો છે, જેના કારણે કેટલીક જગ્યાએ એર ક્વોલિટી (હવાની ગુણવત્તા) ખરાબ નોંધાઈ છે.
નોર્થવેસ્ટ ટેરિટરીઝના ડોક્ટરોએ લોકોને અપીલ કરી છે કે તેઓ નિયમિતપણે એર ક્વોલિટી ઇન્ડેક્સ ચેક કરતા રહે. ધુમાડાવાળા દિવસોમાં N95 માસ્ક પહેરવાની સલાહ આપવામાં આવી છે, કારણ કે તે હવામાં હાજર બારીક કણોને રોકવામાં વધુ અસરકારક હોય છે.
જ્યાં એક તરફ દેશનો મોટો ભાગ ગરમીનો સામનો કરી રહ્યો છે, ત્યાં જ પૂર્વ કેનેડામાં હવામાનનું અલગ જ સ્વરૂપ જોવા મળ્યું. ક્યુબેક અને ન્યૂ બ્રન્સવિકમાં ભારે વાવાઝોડાની ચેતવણી જારી કરવામાં આવી છે. મોન્ટ્રિયલથી ક્યુબેક સિટી વચ્ચેના વિસ્તારોમાં કેટલાંક સમય માટે ટોર્નેડો વૉચ (ચેતવણી) પણ જારી કરવામાં આવી હતી.
ગરમીથી રાહત આપવા માટે ઓટાવા સહિતના ઘણા શહેરોએ કૂલિંગ સેન્ટર્સ અને પબ્લિક સ્વિમિંગ પૂલ ખોલી દીધા છે. કેટલાક વ્યવસાયોએ પણ કર્મચારીઓની સુરક્ષાને ધ્યાનમાં રાખીને અસ્થાયી રૂપે કામ બંધ કરવાનો નિર્ણય લીધો છે.
