બ્રિટનની નવી સરકારે આર્ટિફિશિયલ ઇન્ટેલિજન્સ ક્ષેત્રમાં એક મોટું પગલું ભરતા પ્રથમ એઆઈ મંત્રી બનાવ્યા હતા. બ્રિટનના નવા વડા પ્રધાન એન્ડી બર્નહમે ભારતીય મૂળના સાંસદ કનિષ્ક નારાયણને એઆઈ મંત્રી તરીકે મંત્રીમંડળમાં સામેલ કર્યા છે. આ પહેલી વાર છે જ્યારે કોઈ કેબિનેટમાં એઆઈ મંત્રીની નિમણૂક કરવામાં આવી છે.
કીર સ્ટાર્મરે વડા પ્રધાન પદેથી રાજીનામું આપ્યા પછી સોમવારે કાર્યભાર સંભાળનારા બર્નહમે એક નવું રાજકીય મોડલ બનાવવા અને એક નવી અર્થવ્યવસ્થા બનાવવાનો સંકલ્પ લીધો છે. કેબિનેટમાં થયેલા ફેરબદલ વચ્ચે એ ચહેરામાંના એક છે જેમને સ્ટાર્મરની કેબિનેટમાંથી યથાવત રાખવામાં આવ્યા છે.
સોમવારે કિંગ ચાર્લ્સે બર્નહમને સરકાર બનાવવા માટે આમંત્રણ આપ્યું હતું. બાદમાં બર્નહમે મંત્રીઓની ટીમની જાહેરાત કરી હતી જે કેબિનેટમાં તેમની સાથે કામ કરશે. લિસા નૈડી ભારતીય મૂળના બીજા એક મંત્રી છે જેઓને ડિજિટલ, સંસ્કૃતિ, મીડિયા અને રમતગમતના રાજ્ય સચિવ તરીકે વધારાની જવાબદારીઓ સોંપવામાં આવી છે.
નારાયણે કહ્યું કે, કેબિનેટ ઓફિસ અને બિઝનેસ, ઈનોવેશન, સાયન્સ અને ટ્રેડ વિભાગ હેઠળ એઆઈ મંત્રી તરીકે તેમની નિમણૂક નવા વડા પ્રધાનની એઆઈના મહત્વ પ્રત્યે ઊંડી પ્રતિબદ્ધતા”ની નિશાની છે.
જુલાઈ 2024ની સામાન્ય ચૂંટણીમાં વેલ્સથી સાંસદ તરીકે ચૂંટાયેલા નારાયણે કહ્યું કે “એઆઈ કદાચ માનવ ઇતિહાસમાં સૌથી મહત્વપૂર્ણ ટેકનોલોજી છે. તેની અસર અન્ય બાબતોને વામણી બનાવશે. તેના માટે શ્રેષ્ઠ પરિણામો આપણા કલ્પનાઓથી પણ આકર્ષક છે.
બ્રિટનના લોકો નોકરીઓ, પરિવર્તનની ગતિ માટે ચિંતિત છે. દેશો પાસે ઓછો સમય છે એ નક્કી કરવાનો કે તેઓ એઆઈને આકાર આપશે કે એઆઈ તેમને આકાર આપશે. બ્રિટન હજુ પણ એ તબક્કામાં છે.” બિહારમાં જન્મેલા 36 વર્ષીય લેબર પાર્ટીના સાંસદે ભૂતપૂર્વ વડા પ્રધાન કીર સ્ટાર્મરની ટીમમાં જૂનિયર મંત્રી તરીકે એઆઈની જવાબદારી સંભાળી હતી.
