બિહારમાં ગંગા નદીમાં હોડી પલટી જતાં ૧૩ બાળકોના મોત, 6ને બચાવી લેવાયા

બિહારમાં વૈશાલી જિલ્લાના રાઘોપુરમાં ગંગા નદીમાં હોડી પલટી જતાં ૧૩ લોકોના મોત થયા હતા, જ્યારે છ લોકોને બચાવી લેવામાં આવ્યા હતા. હોડીમાં લગભગ ૧૫ થી ૨૦ લોકો સવાર હતા. સાત અન્ય લોકોને સારવાર ચાલી રહી છે. રાષ્ટ્રપતિ, ઉપરાષ્ટ્રપતિ અને પ્રધાનમંત્રીએ બોટ દુર્ઘટનામાં થયેલા જાનહાનિ પર શોક વ્યક્ત કર્યો છે. પ્રધાનમંત્રીએ કહ્યું કે, બોટ દુર્ઘટનામાં થયેલા જાનહાનિ ખૂબ જ દુઃખદ છે. મોદીએ દરેક મૃતકના વારસદારને 2 લાખ રૂપિયા અને દરેક ઘાયલને 50 હજાર રૂપિયાની સહાયની પણ જાહેરાત કરી છે. મુખ્યમંત્રી સમ્રાટ ચૌધરીએ આ ઘટનામાં થયેલા જાનહાનિ પર શોક વ્યક્ત કર્યો છે અને દરેક મૃતકના પરિવારજનને 4 લાખ રૂપિયાની સહાયની જાહેરાત કરી છે.
રાઘોપુર પ્રખંડના રામપુર શ્યામચંદ ગામ નજીક આ દુર્ઘટના બની હતી. સૌથી હૃદયદ્રાવક વાત એ છે કે મૃતકોમાં રામપ્રવેશ રાય ઉર્ફે રાજાના પરિવારનાં સાત બાળકોનો સમાવેશ થાય છે. ભોજન સમારંભમાં જવા નીકળેલાં આ બાળકોનાં મોતથી પરિવાર સહિત સમગ્ર ગામમાં શોકની લાગણી પ્રસરી છે. બીજી તરફ, હોડી જૂની અને જર્જરિત હોવા છતાં તેને બદલવામાં ન આવી હોવાના આક્ષેપ સાથે ગ્રામજનોએ વહીવટીતંત્ર સામે ભારે રોષ વ્યક્ત કર્યો છે.
ગંગા નદીમાં હોડી ફાટતાં અથવા પલટી જતાં દુર્ઘટના સર્જાઈ હતી. આ ઘટનામાં 13 બાળકોનાં મોત થયાં હોવાનું જણાવવામાં આવ્યું છે.
રામપુર શ્યામચંદ ગામમાં જે ઘરમાં થોડા સમય પહેલાં બાળકોનાં હાસ્ય અને કિલકારીઓ ગુંજતાં હતાં, ત્યાં હવે માતમ છવાયો છે. રામપ્રવેશ રાય ઉર્ફે રાજાના પરિવારનાં સાત બાળકોનાં એકસાથે મોત થતાં પરિવાર પર દુઃખોનો પહાડ તૂટી પડ્યો છે. ભોજન સમારંભમાં જવા માટે ખુશીથી નીકળેલાં બાળકોના ઘરે પાછા ફરવાની રાહ જોવાઈ રહી હતી, પરંતુ તેમના મોતના સમાચારથી પરિવારજનો ભાંગી પડ્યા છે. મળતી માહિતી પ્રમાણે, મંગળવારે રાત્રે આશરે 20 બાળકો હોડીમાં બેસીને ભોજન સમારંભમાં જવા નીકળ્યાં હતાં. આ દરમિયાન ગંગા નદીમાં હોડી ફાટતાં અથવા પલટી જતાં દુર્ઘટના સર્જાઈ હતી.