પાકિસ્તાનમાં સ્કૂલની છત ધરાશાયી થતાં 1 શિક્ષિકા સહીત 21નાં મોત

પાકિસ્તાનના પેશાવરમાં આજે ગુરુવારે એક પ્રાઈવેટ સ્કૂલની છત ધરાશાયી થતાં 21 લોકોનાં મોત થયા છે. તેમાં 20 વિદ્યાર્થીઓ અને એક મહિલા ટીચર સામેલ છે. તમામ બાળકોની ઉંમર 13 વર્ષ અથવા તેનાથી ઓછી છે.આ અકસ્માત દીર કોલોની વિસ્તારમાં થયો હતો. તેમાં 40થી વધુ લોકો ઘાયલ પણ થયા છે. તેમની સારવાર માટે હોસ્પિટલમાં ઈમરજન્સી જાહેર કરવામાં આવી છે.
આ દુર્ઘટના પેશાવરના દિર કોલોનીમાં સર્જાઈ હતી. કેપિટલ સિટી પોલીસી ઓફિસર ડૉ. મિયા સઈદે આ દુર્ઘટના વિશે જાણકારી આપી હતી. ઘટના બાદ રાહત અને બચાવ કામગીરી શરૂ કરાઈ હતી. જેમાં કાટમાળમાં ફસાયેલા બાળકોને શોધવાના પ્રયાસો કરવામાં આવી રહ્યા છે.સ્થાનિક હોસ્પિટલના પ્રવક્તાએ આપેલી માહિતી પ્રમાણે મૃત્યુ પામનારા બાળકોની વય લગભગ 13 વર્ષની આજુબાજુ જ છે. જ્યારે તેમને ભણાવી રહેલ ટીચરનું પણ મોત નીપજ્યું હતું. જ્યારે આ તમામ લોકોને કાટમાળ હટાવીને હોસ્પિટલ પહોંચાડવામાં આવ્યા ત્યારે આ તમામ લોકો મૃત્યુ પામી ચૂક્યા હતા. જોકે હજુ પણ 40થી વધુ બાળકો છે જેમની સારવાર ચાલી રહી છે.
પાકિસ્તાનની સેનાના જવાનો પણ બચાવ અને રાહત એજન્સીઓની મદદ કરી રહ્યા છે. તેઓ કાટમાળમાં દટાયેલા બાળકો અને સ્કૂલના કર્મચારીઓને બહાર કાઢીને તેમને હોસ્પિટલ પહોંચાડી રહ્યા છે. પાકિસ્તાનના વડાપ્રધાન શહબાઝ શરીફે દુર્ઘટનામાં લોકોનાં મોત પર ભારે દુઃખ વ્યક્ત કર્યું. તેમણે મૃતકોના પરિવારજનો પ્રત્યે સંવેદના વ્યક્ત કરી અને આ મુશ્કેલ સમયમાં તેમને હિંમત મળે તે માટે પ્રાર્થના કરી તેમણે અધિકારીઓને ઘાયલો માટે શક્ય તેટલી સારી સારવારની વ્યવસ્થા કરવા અને બચાવ કામગીરીમાં ઝડપ લાવવાનો નિર્દેશ આપ્યો છે.ખૈબર પખ્તૂનખ્વાના ગવર્નર ફૈસલ કરીમ કુંડીએ પણ દુર્ઘટના પર દુઃખ વ્યક્ત કર્યું. તેમણે મૃત્યુ પામેલા બાળકોના પરિવારજનો પ્રત્યે સંવેદના વ્યક્ત કરી.ગવર્નરે કહ્યું કે નિર્દોષ બાળકોનાં જીવ જવું અત્યંત દુઃખદ દુર્ઘટના છે. તેમણે ઘાયલ બાળકો જલદી સ્વસ્થ થાય તેવી પ્રાર્થના કરી અને સંબંધિત અધિકારીઓને તેમને સારી મેડિકલ સુવિધાઓ પૂરી પાડવાનો નિર્દેશ આપ્યા. તેમણે અધિકારીઓ પાસેથી સ્કૂલની છત ધરાશાયી થવાની ઘટના અંગે વિગતવાર રિપોર્ટ માંગ્યો છે. સાથે જ દુર્ઘટનાનું કારણ જણાવવાનો નિર્દેશ પણ આપ્યો છે.