ભાવનગર જિલ્લાની સાત પૈકી 6 બેઠકમાં ભાજપે ઉમેદવાર જાહેર કર્યા હતા જ્યારે ભાવનગર પૂર્વની બેઠક માટે કોકડું ગૂંચવાયેલું હતું અને લાંબી ગડમથલ આજે સવારે ભાજપે પૂર્વની બેઠકના ઉમેદવાર તરીકે સેજલબેન પંડ્યાનું નામ સતાવાર રીતે જાહેર કર્યું છે, ગત રાતથી તેમના નામની ચર્ચા જોરમાં હતી, આજે સવારે ભાજપે તેમના નામની સતાવાર જાહેરાત કરતા ચર્ચા અને અટકળોનો અંત આવ્યો છે. વધુમાં પ્રાપ્ત માહિતી મુજબ સેજલબેનને જીતાડવાની જવાબદારી વિભાવરીબેન દવેએ લીધી છે.
ભાવનગર પૂર્વની બેઠક વણિક બ્રાહ્મણની ગણવામાં આવે છે, ભાજપના ઉમેદવારની જીત માટે આ બેઠક સરળ છે આથી બેઠકના દાવેદાર વધુ રહે છે, a વખતે પણ અનેક દાવેદાર અને સક્ષમ ચહેરાને કારણે ટિકિટ કોને આપવી.? તે ગડમથલ ભાજપ મોવડી મંડળને રહી હતી, સિટીંગ ધારાસભ્ય સામે પક્ષમાં જ નારાજગી અને પરિવર્તનની પ્રબળ માંગ હોવાથી ભાજપે નવો ચહેરો મૂકવો જરૂરી થઈ પડ્યું હતું. પરંતુ અનેક દાવેદારો વચ્ચે કોને ટિકિટ આપવી તે પણ મૂંઝવણ હતી. ભાવનગર જિલ્લામાં 7 પૈકી 6 બેઠક પુરુષ ઉમેદવારને આપી દેવાતાં પૂર્વની બેઠકની ટિકિટ મહિલાને આપવાની હોવાથી મહિલા દાવેદારો વચ્ચે સ્પર્ધા રહી હતી જેમાં આખરે સેજલબેન પંડ્યાનો ઘોડો વિન રહ્યો હતો. તેઓ શહેર ભાજપ પ્રમુખ રાજીવ પંડ્યાના પત્ની હોવાનો લાભ મળ્યો હોવાનું મનાય છે ઉપરાંત સૂત્રોથી પ્રાપ્ત વિગતો અનુસાર ધારાસભ્ય વિભાવરબેન એ પણ તેમના નામની ભલામણ કરી સેજલબેનને જીતાડવાની જવાબદારી લીધી છે. આમ, એકથી વધુ પરિબળને કારણે સેજલબેનને ટિકિટ મળી છે.
