ગુલમર્ગ ગોંડોલામાં સવારી કરવા માટે નકલી ટિકિટનો ઉપયોગ કરવા બદલ 11 ગુજરાતીઓની ધરપકડ

પોલીસે કાશ્મીરમાં ગુલમર્ગ ગોંડોલામાં સવારી કરવા માટે નકલી ટિકિટનો ઉપયોગ કરવા બદલ 11 ગુજરાતીઓની ધરપકડ કરી છે. તેમની સાથે એક લોકલ ટુરિસ્ટ ગાઈડ પણ સામેલ છે. આ મહિનાનો આ બીજો કિસ્સો છે જ્યારે પોલીસે નકલી ટિકિટના આરોપમાં પ્રવાસીઓને પકડ્યા છે. અગાઉ 14 એપ્રિલે મુંબઈથી આવેલા ઓછામાં ઓછા 28 પ્રવાસીઓ પાસે નકલી ટિકિટો પણ મળી આવી હતી.
અધિકારીઓના જણાવ્યા અનુસાર, ગુરૂવારે એક ગોંડોલામાં કોંગડોરીથી ગુલમર્ગ આવતાં વખતે સ્થાનિક ગાઈડ સાથે ગુજરાતના 11 પ્રવાસીઓ નકલી અને એડિટ કરેલી ટિકિટો સાથે ઝડપાયા હતા. અધિકારીઓએ જણાવ્યું કે પ્રવાસીઓ ટટ્ટુ પર સવાર થઈને કોંગડોરી પહોંચ્યા હતા અને નકલી ટિકિટ પર ગોંડોલા રાઈડનો આનંદ માણવા માંગતા હતા. હાલ પોલીસ આ લોકોને ગંડોલાથી ગુલમર્ગ લાવી છે.
ગંડોલા પ્રોજેક્ટના મેનેજિંગ ડિરેક્ટર ગુલામ જિલાનીએ જણાવ્યું હતું કે, “અમારા અધિકારીઓ શૌકત અહમદ ભટ (પ્રોજેક્ટ ઈન્ચાર્જ) અને પરવેઝ અહમદ કુરેશી (ટિકિટીંગ ઈન્ચાર્જ)એ ઔપચારિકતા પૂરી કરી હતી અને મામલો પોલીસને સોંપવામાં આવ્યો હતો.” પોલીસે આ મામલે તપાસ શરૂ કરી છે અને પ્રવાસીઓને નકલી ટિકિટ આપનાર ગુનેગારની ધરપકડ કરી છે.
ગુલમર્ગ ગોંડોલાના મેનેજમેન્ટે સામાન્ય જનતા અને ખાસ કરીને પ્રવાસીઓને વિનંતી કરી હતી કે તેઓ એવા દલાલોનો શિકાર ન થાય જેઓ તેમની સાથે છેતરપિંડી કરે છે અને તેમને નકલી ટિકિટ આપે છે. જિલાનીએ જણાવ્યું હતું કે, “ગુલમર્ગ ગોંડોલા પ્રોજેક્ટની ક્ષમતા છે, જેના પરિણામે અમે પ્રતિ દિવસ ટિકિટોની સંખ્યા મર્યાદિત કરી છે. ટિકિટ માત્ર ઓનલાઈન જ ઉપલબ્ધ છે અને અન્ય કોઈ માધ્યમ નથી. સંપાદિત અને નકલી ટિકિટ પર મુસાફરી કરવી એ સજાપાત્ર ગુનો છે. “
અગાઉ 14 એપ્રિલના રોજ, ગુલમર્ગ ગોંડોલા પ્રોજેક્ટની ટિકિટ સ્કેનિંગ ટીમે સ્કેનિંગ પોઈન્ટ પર મુંબઈના 28 પ્રવાસીઓના જૂથને અટકાવ્યું હતું. આ મુસાફરો તેમના ટૂર મેનેજર મકરંદ આનંદ ઘાણેકર દ્વારા એડિટ કરેલી નકલી ટિકિટો લઈ જતા હતા, જેમણે પોતે મુંબઈમાં આ ટિકિટોનું સંપાદન કર્યું હતું અને મુસાફરોને આ ગેરકાયદેસર પ્રવૃત્તિની જાણ નહોતી.