ભાવનગર તા.૧
આજથી પાંચ વર્ષ પહેલાં યુવકનું અપહરણ કરી હત્યા કરવાના ગુનામાં મહુવાની કોર્ટે આરોપીને આજીવનકેદની સજા અને રૂ.૧૦ હજારનો દંડ ફટકાર્યો હતો.
આ અંગે પ્રાપ્ત વિગત મુજબ મહુવા તાલુકાના સુંદરનગર-વાઘનગરમાં રહેતા મનસુખ ઉર્ફે ભાવેશ હામાભાઇ મકવાણાએ આજ થી પાંચ વર્ષ પહેલા અશોકભાઈ વેલાભાઈ બારૈયાને પોતાની દીકરીને જોવાના બહાને સુંદરનગર બોલાવી અશોકભાઈનું અભ્યારણ કરી તેમને બાવળના ઝાડ સાથે લોખંડની સાંકળથી બાંધી દઈ તેનો મોબાઇલ ઝૂંટવી લઈને હત્યા કરી હતી. આ બનાવ અંગે મૃતકના બહેન મનીષાબહેન વેલાભાઈ બારૈયાએ ગત તા. ૨૭/૫/ ૨૦૧૮ ના રોજ મહુવા પોલીસ મથકમાં ફરિયાદ નોંધાવી હતી.
આ બનાવ અંગેનો કેસ મહુવાના ચોથા એડિશનલ સેશન્સ જજ દિવ્યાંગભાઈ સી. ત્રિવેદીની કોર્ટમાં ચાલી જતા સરકારી વકીલ રૂબીનાબેન એચ ખલીયાણીની દલીલો,૭૦ જેટલા દસ્તાવેજી પુરાવાઓ અને ૪૪ સાહેદોની મૌખિક જુબાનીને ધ્યાને લઈને અદાલતે આરોપી મનસુખ ઉર્ફે ભાવેશ દામાભાઈ મકવાણાને કસૂરવાર ગણી આજીવનકેદની સજા અને રૂ.૧૦ હજારનો દંડ ફટકાર્યો હતો. આરોપી દંડ ભરવામાં કસૂર કરે તો વધુ છ માસની સજાનો હુકમ કર્યો હતો.
