જાતીય શોષણના કેસમાં ડોનાલ્ડ ટ્રમ્પને 50 લાખ ડોલરનો દંડ

ન્યૂયોર્ક
અમેરિકાના પૂર્વ રાષ્ટ્રપતિ ડોનાલ્ડ ટ્રમ્પની મુશ્કેલીમાં વધારો થયો છેતેમને અમેરિકાના ન્યૂયોર્કની કોર્ટમાંથી જબરદસ્ત ઝટકો લાગ્યો છે. કોર્ટે ડોનાલ્ડ ટ્રેમ્પને જાતીય શોષણના કેસમાં દોષિત ઠેરવ્યા છે. તેમને જાતીય સતામણી અને માનહાનિ મામલે 50 લાખ ડોલરનો દંડ ફટકારવામાં આવ્યો છે.
કોર્ટે ચુકાદો સંભળાવતી વખતે કહ્યું કે, ટ્રેમ્પ 1990ના દાયકામાં એક મેગેઝિનની લેખિકા ઈ. જીન કૈરલનું જાતીય શોષણ કરવાના કેસમાં દોષિત છે. ડોનાલ્ડ ટ્રમ્પે અનેક વખત કૈરલને બદનામ કરવાનો પ્રયાસ પણ કર્યો છે. કોર્ટે ડોનાલ્ડ ટ્રમ્પને દોષિત ઠેરવ્યા અને કૈરલને નુકસાની પેટે 50 લાખ ડોલરનું વળતર આપવાનો આદેશ કર્યો છે. જો કે, કોર્ટે ટ્રમ્પને ડિપાર્ટમેન્ટલ સ્ટોરમાં કૈરલ પર દુષ્કર્મ કરવા માટે દોષિત ઠેરવ્યા નથી . જ્યુરીએ કૈરોલના દુષ્કર્મના આરોપને ફગાવી દીધો અને કહ્યું કે આ કેસ ક્રિમિનલ કોર્ટમાં નહીં પરંતુ સિવિલ કોર્ટીની સમક્ષ લાવવામાં આવ્યો હતો.
પૂર્વ રાષ્ટ્રપતિ ટ્રમ્પે કોર્ટના આ નિર્ણયને સાર્વજનિક રીતે અપમાનજનક અને તેમની બદનામીનું કારણ ગણાવ્યું છે.ડોનાલ્ડ ટ્રમ્પ વિરુદ્ધ આ કેસમાં 25 એપ્રિલથી સુનાવણી શરૂ થઈ હતી અને હવે નવ સભ્યોની જ્યુરીએ ટ્રમ્પને જાતીય શોષણ માટે દોષિત ઠેરવ્યા છે.
ટ્રમ્પે આ કેસની સુનાવણી દરમિયાન પીડિતા કૈરોલને અનેકવાર બદનામ કર્યા હતા. તેમણે કેરોલના આરોપોને બનાવટી કહાની ગણાવી હતી. કૈરલે આરોપ લગાવ્યો હતો કે, ટ્રમ્પે 1996માં મેનહટનના એક ડિપાર્ટમેન્ટલ સ્ટોરના ડ્રેસિંગ રૂમમાં તેમની સાથે દુષ્કર્મ આચર્યું હતું. કૌરલે સૌ પ્રથમવાર 2019માં એક પુસ્તકમાં આ ઘટનાનો ઉલ્લેખ કર્યો હતો. નોંધનીય છે કે છેલ્લા કેટલાક વર્ષોમાં ડઝનથી વધુ મહિલાઓએ ટ્રમ્પ પર જાતીય સતામણીનો આરોપ લગાવ્યો છે