રાજસ્થાનના 500થી વધુ ગામોમાં હજુ અંધારપટ

જયપુર
અરબ સાગરમાંથી નીકળેલ ચક્રવાત બિપોરજોય ગુજરાત બાદ રાજસ્થાનમાં તબાહી મચાવી હતી. તેની અસરને કારણે રાજ્યના ઘણા વિસ્તારોમાં 36 કલાક ભારે વરસાદ થયો, જેના કારણે પૂર જેવી સ્થિતિ સર્જાઈ છે. છેલ્લા 24 કલાકથી ભારે વરસાદ અને ભારે પવને બાડમેર જિલ્લાને હચમચાવી નાખ્યું છે. અનેક વિસ્તારોમાં પૂર જેવી સ્થિતિના કારણે 500થી વધુ ગામોમાં અંધારપટ જાહેર કરવામાં આવ્યો છે.
બાડમેર, સિરોહી, બાંસવાડા, ઉદયપુર, રાજસમંદ, પાલી, અજમેર, કોટા સહિતના અનેક જિલ્લાઓમાં ભારે વરસાદના કારણે જનજીવન અસ્તવ્યસ્ત થઈ ગયું છે. આ જિલ્લાઓના કેટલાક વિસ્તારોમાં અત્યાર સુધીમાં 10 થી 13 ઇંચ વરસાદ નોંધાયો છે. કોઈપણ રીતે ગામમાં વીજળી ચાલુ થાય તે માટે વહીવટીતંત્ર દ્વારા સતત પ્રયાસો કરવામાં આવી રહ્યા છે, પરંતુ સતત વરસાદ અને ભારે પવને વહીવટીતંત્રનો આખો ખેલ બગાડી નાખ્યો છે. જાલોર જિલ્લાના સાંચોરમાં સુરવા ડેમ તૂટવાને કારણે અનેક વિસ્તારો ડૂબી ગયા છે. ડેમ તૂટવાને કારણે નર્મદા કેનાલમાં પાણી વધવાથી તે પણ તુટી ગઈ છે. હવે સૌથી વધુ ખતરો સાંચોર શહેર પર મંડરાયો છે. શનિવારે રાત્રે ડેમ તૂટવાની માહિતી મળતા જ સમગ્ર શહેરને ખાલી કરાવવામાં આવ્યું હતું.